पोखरा । यू–१९ वाईवाई कप कास्की जिल्ला पुरुष क्रिकेट छनोट प्रतियोगिता–२०८१ टिम वाराही विजेता बनेको छ । कास्की जिल्ला क्रिकेट संघ आयोजना तथा पोखरा महानगरपालिकाको सहयोगमा पोखरा रंगशालामा भएको प्रतियोगिता वाराही विजयी भएको हो । शुक्रबार उसले विन्ध्यवासिनीलाई ५ विकेटले हरायो ।

विन्ध्यवासिनी दोस्रो, भद्रकाली तेस्रो र अकला चौथोमा सीमित भयो । शुक्रबार पहिलो खेलमा भद्रकालीले अकलालाई ३ रनले हराएको थियो ।

टस जितेर ब्याटिङ रोजेको भद्रकाली २५ ओभर खेल्दै ८ विकेट गुमाएर १०८ रन जोडेको थियो । १०९ को लक्ष्य पछ्याउँदै जवाफी ब्याटिङमा मैदान उत्रिएको अकला २१.३ ओभरमा अल आउट भएको हो ।

दोस्रो खेलमा टस जितेर ब्याटिङ रोजेको विन्ध्यवासिनी २१.१ ओभर खेल्दै १० विकेट गुमाएर ८३ रनमा समेटिन पुगेको थियो । ८४ रनको झिनो लक्ष्य पाएको वाराहीले ११.३ ओभर खेल्दै ५ विकेट गुमाएर लक्ष्य पूरा गरेको थियो ।

वाराहीका नितेश गिरी उत्कृष्ट बलर, विन्ध्यवासिनीका सिव्रिन श्रेष्ठ उत्कृष्ट ब्याट्सम्यान र वाराहीका आदित्य थापा म्यान अफ दि सिरिज भए ।
प्रतियोगितामा पहिलो चरणमा ८४ खेलाडीबाट ४८ छनोट गरी ४ टिम तयार गरिएको आयोजक संघ कास्की अध्यक्ष सञ्जयकान्त सिग्देलले बताए । जिल्लास्तरीय प्रतियोगितापछि प्रदेशस्तरीय प्रतियोगिता हुने भएकोले १४ खेलाडी छनोट उनले बताए ।