पोखरा । प्रतिपक्षी दलको लहरमा राखिएका पूरै कुर्सी खाली राखेर गण्डकी प्रदेश सभाको बैठक बसेको छ ।

सदनमा आगामी बजेटको सिद्धान्त र प्राथमिकता पेस गर्ने कार्यसूचीसहित बैठक बसेको थियो । कार्य व्यवस्था परामर्श समितिको बैठकमा समेत विपक्षी दलका प्रतिनिधि कोही पनि उपस्थित थिएनन् ।

तैपनि बोलाइएको बैठक बस्ने निर्णय समितिले गरेको थियो । बैठक सुरु भएलगत्तै सभामुख कृष्णप्रसाद धितालले प्रदेश प्रमुखको कार्यालयबाट प्राप्त पत्र पढेर सुनाए । जसमा मन्त्रीपरिषद पुनर्गठन सम्बन्धी जानकारी थियो । कार्यसूचीको दोस्रो नम्बरमा आगामी बजेटको सिद्धान्त र प्राथमिकता पेस गर्ने उल्लेख थियो ।
सभामुखको आसनको दायाँतर्फको प्रतिपक्षको लहर खाली रहेकाले कार्यसूचीमा रहेको दोस्रो बुँदालाई कार्यसूचीबाट हटाएर बैठक १५ गते दिउँसो १ बजेसम्मका लागि स्थागन गरिएको छ ।

प्रतिपक्षमा रहेका नेपाली कांग्रेस र राप्रपा बैठकमा उपस्थित भएनन् । माओवादी संसदीय दलमा रहेका नेसपाका फडिन्द्र देवकोटा समेत बैठकमा आएनन् । बैठकमा उपस्थित हुने सदस्यले प्रतिदिन १ हजार रुपैयाँ भत्ता र यातायातबाट दैनिक ७ सय रुपैयाँ पाउने प्रावधान छ । सुविधा गाडी पाउने भने यातायात खर्चवापतको रकम पाउँदैनन् ।

वैशाख २३ मा मुख्यमन्त्री खगराज अधिकारीले सदनबाट लिएको विश्वासको मत कानुनसम्मत नभएको भन्दै कांग्रेस मुद्दा लिएर सर्वोच्च गएको छ । सर्वोच्चले अधिकारी सरकारलाई दीर्घकालीन महत्व राख्ने निर्णय नगर्न आदेश समेत दिइसकेको छ ।