पोखरा । कास्की मोडेनाइज्ड एकेडेमी, चाउथेले यस वर्ष विद्यालयमा भर्ना भएका नयाँ विद्यार्थी तथा नवनियुक्त शिक्षकलाई स्वागत तथा सम्मान कार्यक्रम गरेको छ । विद्यालयले प्रत्येक वर्ष नयाँ विद्यार्थी तथा शिक्षकलाई स्वागत तथा सम्मान गर्दै आएको छ । उक्त कार्यक्रमलाई निरन्तरता दिँदै अहिले जेठ ८ र ९ गते विद्यालयको आफ्नै प्रेक्ष्यालयमा उक्त कार्यक्रम सम्पन्न गरेको थियो ।

संस्थापक प्राचार्य रामबहादुर मोचीले कास्की मोर्डनाइज्ड एकेडेमी शैक्षिक ल्याब भएको बताए । यहाँबाट विद्यार्थीले धेरै क्षेत्रका धेरै कुरा सिक्न र शिक्षकले सिकाएर नतिजा निकाल्न सक्ने कुरा व्यक्त गर्दै नवआगन्तुक सबैलाई स्वागत गरे ।

विद्यालय व्यवस्थापन समिति अध्यक्ष राधा नेपालीले विद्यार्थीलाई आवश्यक हरेक कुराको व्यवस्थापन गरिएको र यदि थप आवश्यक परेमा विद्यालयले त्यसलाई पूरा गर्ने भन्दै पढ्ने र पढाउने कुरामा सकेसम्म युगको माग अनुसार अगाडि बढ्नु पर्ने बताए । सहप्राचार्य शिवलाल उपाध्यायले नवप्रवेशी शिक्षक तथा विद्यार्थीले नयाँ महसुुुस नगरी आफ्नो कार्य क्षेत्रमा लाग्न र हामी तपाईंको गाह्रो साह्रोमा सधैं साथमा रहेको कुरा बताउँदै विद्यालयका नीतिगत कुरामा एक भएर लाग्नु पर्ने बताए ।

नवआगन्तुक विद्यार्थी र शिक्षकलाई खादा तथा मायाको चिनो प्रदान गरिएको थियो । सोही कार्यक्रममा शैक्षिक सत्र–२०८० को शैक्षिक पुरस्कार, उकृष्ट मनिटर, उत्कृष्ट सरसफाइ, अनुशासन एवं सबै क्षेत्रमा उत्कृष्ट प्रमाणित हुने विद्यार्थीलाई अल राउण्डर अफ दि इयरसमेत प्रदान गरिएको थियो ।

विभिन्न तह र चरणमा सञ्चालित उक्त कार्यक्रममा शैक्षिक प्रमुख शिवु ढकाल, मिलन तिमिल्सिना, गंगा आले, कल्पना गुर्माछन, पवित्रा तामाङ, निर्मला पहारी, नयाँ तथा पुराना विद्यार्थीले शुभकामना मन्तव्य राखेका थिए ।

कार्यक्रममा विद्यार्थीले विभिन्न नृत्य तथा गायन प्रस्तुत गरेका थिए भने कार्यक्रम सञ्चालन शिक्षक अनुराग अधिकारीको नेतृत्वमा आरजे एमसी विधाका विद्यार्थीद्वारा गरिएको थियो ।