स्याङ्जा ९ जेठ । राष्ट्रिय महिला आयोगले विद्यालयस्तरमा हुने लैंगिक हिंसा निवारणका सम्बन्धमा शिक्षक, विद्यार्थी र विद्यालय व्यवस्थापन समितिका पदाधिकारीबीच अभिमुखीकरण कार्यक्रम गरेको छ ।

जिल्ला समन्वय समिति प्रमुख श्रीप्रसाद घर्तीले कार्यक्रम उद्घाटन गर्दै अपरिचित ब्यक्तिसँग अनावश्यक बोलचाल गर्न नहुने बताए । चिनजान नभएका ब्यक्तिसँग सम्बन्ध बिस्तार नगर्न सुझाव दिँदै उनले सुरुमा प्रलोभन देखाउँदै पछि हिंसासंगै ठूल्ठूला आपराधिक घटनासम्म घट्न सक्ने आशंका ब्यक्त गरे ।

नगर प्रमुख तुलसीराम रेग्मीले पुतलीबजार नगरपालिका सबै बालबालिकाले शिक्षा पाउनु पर्नेमा आफू संवेदनशील रहेको बताए । नगरप्रमुख भएदेखि पुतलीबजारका विद्यालयमा यस्ता खालका हिंसात्मक घटना नघटेको जनाउँदै यस्ता घटना हुन नदिन सबै सचेत र सजग बन्नुपर्नेमा जोड दिए ।

नगरभित्रका विद्यार्थीलाई संघीय सरकारले दिएको खाजा रकमको दैनिक १५ रुपैयाँमा पुतलीबजारले १० रुपैयाँ थप दिएको र स्याङ्जाको सरकारी विद्यालयमा सञ्चालित सवइन्जिनियरिङ् पढ्ने विद्यार्थीका लागि १ लाख १० हजार आर्थिक अनुदान दिएको नगरप्रमुख रेग्मीले जानकारी गराए ।

कार्यक्रममा राष्ट्रिय महिला आयोगका सदस्य कृष्णकुमारी पौडेल, प्रमुख जिल्ला अधिकारी सुनिता नेपाल, प्रहरी उपरीक्षक शालिकराम शर्मा, आयोगका उपसचिव सीता अधिकारीले महिला तथा बालबालिका सम्बन्धी कार्यपत्र प्रस्तुत गरेका छन् ।
कार्यक्रममा पत्रकार महासंघ अध्यक्ष श्रीकृष्ण सिग्देल, शिक्षक सीता नेपाल, बाल सञ्जालका अध्यक्ष सुजाता पौडेल लगायतले सुझावसहितका धारणा सुनाएको राष्ट्रिय महिला आयोगका उपसचिव सीता अधिकारीले बताइन् ।