पोखरा । विन्ध्येश्वरी आदर्श बोर्डिङ स्कुलमा विद्यार्थी प्रमुख तथा उपप्रमुख चयन तथा स्वागत कार्यक्रम भएको छ ।

विद्यालयमा हुने गतिविधि सहज रुपमा सम्पन्न गर्न तथा विद्यालयलाई अनुशासित क्षेत्र बनाउन र विद्यार्थीलाई निर्वाचन प्रक्रियाबारे सिकाउने मतदान प्रक्रियाबाट प्रमुख तथा उपप्रमुखको छनोट गरिएको हो । ७ जना विद्यार्थीहरुले प्रतिस्पर्धा गरेको सो निर्वाचनमा कक्षा २ देखि १० सम्मका विद्यार्थीले मतदान गरी प्रमुख तथा उपप्रमुख चुनेका हुन् ।

जसका लागि विद्यालयका शैक्षिक प्रमुख होमराज अधिकारीको अध्यक्षतामा एउटा टोली गठन गरिएको थियो ।

कक्षा १० का आविष्कार शाही प्रमुख र सुजन बालकोटी उप–प्रमुखमा निर्वाचित भए ।

सोही अवसरमा नवआगन्तुक विद्यार्थी तथा शिक्षकलाई स्वागत गरिएको छ ।

कार्यक्रममा कक्षा ९ की प्रशंसा कार्कीले स्वागत मन्तव्य व्यक्त गरिन् । कार्यक्रममा विद्यार्थीले आफ्नो कला प्रस्तुत गरेका थिए ।

प्राचार्य कृष्णकुमार श्रेष्ठले विद्यार्थी तथा शिक्षकको उज्ज्वल भविष्यको कामना गर्दै शुभकामना दिएका थिए ।

नवआगन्तुक विद्यार्थीका तर्फबाट कक्षा ७ की उपासना रेग्मीले धन्यवाद ज्ञापन गरेकी थिइन् भने सञ्चालन परीक्षा प्रमुख शिक्षिका माया क्षत्रीले गरेकी हुन् ।