गैंडाकोट । गैंडाकोट ५ मा रहेका बाल क्लबलाई वडा कार्यालयले खेलकुद सामग्री उपलब्ध गराएको छ । वडामा रहेका १९ वटा बाल क्लबलाई आइतबार खेलकुद सामग्री उपलब्ध गराएको हो ।

नगर प्रमुख मदनभक्त अधिकारीले खेलकुद सामग्री वितरण गर्दै बालबालिकालाई खेलकुद क्षेत्रमा अघि बढ्नका लागि वडाले प्रदान गरेका खेलकुद सामग्रीले महत्वपूर्ण भूमिका खेल्ने विश्वास व्यक्त गरे ।

वडाका सबै १९ वटा बाल क्लबलाई खेलकुद सामग्री विरण गरिएको वडा अध्यक्ष रत्नप्रसाद सापकोटाले जानकारी दिए । ‘बालबालिकालाई खेलकुदमा हौसला प्रदान गर्न सामग्री प्रदान गरिएको हो,’ सापकोटाले भने, ‘बालबालिकाको विकासका लागि शिक्षासँगै खेलकुदको पनि उत्तिकै महत्व रहेकाले वडाले बालबालिकालाई प्रोत्साहनका लागि खेलकुद सामग्री वितरण गरेको हो ।’

कार्यक्रममा ब्याडमिन्टन, भलिबल, फुटबल, क्यारेमबोर्डलगायत सामग्री बाल क्लबलाई वितरण गरिएको हो । खेलकुद सामग्री पाएपछि बाल क्लबका विद्यार्थीहरू खुसी हुँदै वडा कार्यालयलाई धन्यवाद दिए । कार्यक्रममा शान्ति न्यौपाने, लक्ष्मण कार्की, विष्णु गौतम, पार्वती सापकोटालगायतले बोलेका थिए ।