पोखरा । चितवनको खैरहनी नगरपालिका वडा नं ८ को आयोजना तथा साभ नेपालको सहजीकरणमा वैशाख ७ र ८ गते अभिभावक सचेतना कार्यक्रम सम्पन्न भयो ।

नगरप्रमुख शशीकुमार खनियाले कार्यक्रम उद्घाटन गर्दै बालबालिकामा देशको भविश्य रहेकाले सोही अनुसारका बालबालिकाको क्षमता विकासका लागि अभिभावक नै बढी जिम्मेवार रहने र संस्कारसहितको बालक विद्यालय प्रवेशसँगै उचित शैक्षिक वातावरणले मात्र असल नागरिक उत्पादन हुने हुँदा अभिभावकीय शिक्षा अति आवश्यक भएको बताए ।

खैरहनी वडा नम्बर ८ का कार्यवाहक अध्यक्ष श्याम पाठकको अध्यक्षतामा भएको कार्यक्रममा शिक्षा अधिकृत रविन देवकोटाले सञ्चालन र शिक्षा शाखा प्रमुख राजु बानियाले स्वागत गरेका थिए ।

शिक्षा शाखा प्रमुख राजु बानियाले बालकले पहिलो शिक्षा घरबाटै प्राप्त गर्ने हुनाले अभिभावक शिक्षा अपरिहार्य रहेकोमा जोड दिए ।

तालिममा साभ नेपालका अध्यक्ष डा. तुलसीराम खनालले प्रशिक्षण थिए । उनले बालबालिका बाबुआमाका लागि सर्वस्व हुन् र तिनीहरुलाई असल संस्कार दिने पहिलो जिम्मेवारी अभिभावककै भएको उल्लेख गरे । अभिभावकलाई आफ्ना सन्तानप्रति जिम्मेवारी बोध गराउँदै प्रशिक्षक स्वस्तिका तिवारीले अभिभावकलाई सहजीकरण गरेकी थिइन् ।

उनले भने, ‘बालबालिकाको पहिलो पाठशाला घर हो भने बाबुआमा पहिलो गुरु हुन् । घरबाट जस्तो शिक्षा र संस्कार लिएर बालक हुर्कन्छ त्यसको प्रत्यक्ष प्रभाव दीर्घकालीन समयसम्म रहिरहन्छ । आजको परिवेशमा परिवर्तन र सम्भावनासँगै बालबालिकालाई उचित सिकाइ वातावरण घरबाटै सुरु गर्न जरुरी देखिन्छ ।’ दोस्रो दिन वडाबासी अभिभावकको सक्रिय सहभागिता थियो । कार्यक्रममा सहजकर्ता टीका सापकोटा, सीतादेवी पौडेल र रमेशचन्द्र पुरीले अभिभावकलाई सहजीकरण गरेका थिए । तालिममा १ सय जना सहभागी थिए ।