पोखरा । गण्डकी प्रदेशमा बिनाविभागीय २ जना मन्त्रीहरुले मन्त्रालयको जिम्मा पाएका छन् । माओवादीका हरिबहादुर चुमानले आर्थिक मामिला र राजीव गुरुङ (दीपक मनाङे) ले भौतिक पूर्वाधार तथा यातायात व्यवस्था मन्त्रालयको जिम्मेवारी पाएका हुन् ।

शनिबार बिहान बसेको मन्त्रिपरिषद्को बैठकले उनीहरुको जिम्मेवारी बाँडफाँड गरेको हो ।

गत २५ चैतमा नेपालको संविधान १६८(२) बमोजिम मुख्यमन्त्री नियुक्त नेकपा एमाले संसदीय दलका नेता खगराज अधिकारीले आफ्नो क्याबिनेटमा चुमान र मनाङे गरी ३ सदस्यीय मन्त्रिमण्डल बिस्तार गरेका थिए ।

सत्ताघटक माओवादी संसदीय दलका नेता चुमान र मनाङेलाई बिनाविभागीय मन्त्रीको जिम्मेवारी दिएका थिए । मनाङेले गण्डकी प्रदेशमा योसहित ५ पल्ट मन्त्री बन्ने रेकर्ड राखेका छन् ।

तर प्रदेशसभा सभामुख कृष्णप्रसाद धिताललाई समेत गनेर मुख्यमन्त्री नियुक्त खगराज अधिकारीविरुद्ध सर्वोच्चमा रिट निवेदन दर्ता भएको छ । सर्वोच्चमा विचाराधीन उक्त मुद्दाको पेसी १० वैशाखलाई तोकिएको छ ।