पोखरा। ‘सबै मौसम पर्यटकका लागि खुला छ’ भन्ने सन्देश दिँदै घान्द्रुक पर्यटन महोत्सव सकिएको छ । घान्द्रुक पर्यटन व्यवस्थापन समिति आयोजनामा ४ दिनसम्म चलेको महोत्सव शुक्रबार सकिएको हो ।

समापनमा प्रदेशसभा सदस्य प्रकाश बरालले पोखरा पर्यटकीय राजधानी घोषणा भैसकेको अवस्थामा महोत्सवले पर्यटकीय गतिविधि उचाइमा पुर्‍याउन सघाएको बताए । घान्द्रुकको पर्यटन क्षेत्रको विकास, बिस्तार र प्रचारमा सबै एकजुट हुनुपर्ने उनले जोड दिए ।

आयोजक समिति अध्यक्ष विक्रम गुरुङले महोत्सवले आन्तरिक पर्यटन प्रवद्र्धनमा टेवा पुगेको बताए । उनका अनुसार महोत्सवमा करिब १० हजार पर्यटक आए । समितिले महोत्सव अवधिमा घान्द्रुक घुम्ने पर्यटकलाई ३० प्रतिशत छुट दिएको महोत्सव संयोजक अमृत लामा गुरुङले बताए । महोत्सवका विभिन्न प्रतियोगितामा सहभागी खेलाडीलाई खाना र बस्नका लागि प्रतिव्यक्ति ६ सय रुयैयाँ निर्धारण गरिएको थियो ।

महोत्सवमा पर्यटक तथा दर्शकले घान्द्रुकमा उत्पादन भएको खाद्यान्न र संस्कार, संस्कृतिसँगै प्रतियोगिताबाट मनोरञ्जन लिएको उनले सुनाए ।

क्लबस्तरीय पुरुष भलिबल प्रतियोगिताको उपाधि विद्यान स्पोर्टस् क्लबले जितेको छ । विद्यानले अन्नपूर्ण युवा क्लब किम्चेलाई ३–१ सेटमा पराजित १ लाख ११ हजार १ सय ११ रुपैयाँ जितेको हो । उपविजेताले ७० हजार रुपैयाँसहित सिल्ड, मेडल र प्रमाणपत्र प्राप्त गरेको महोत्सव संयोजक अमृत गुरुङले बताए ।

बास्केटबल प्रतियोगिताको उपाधि टाइम्सले जित्यो । त्रिभुवन आर्मीलाई ५६–४७ अंकले पराजित गर्दै १ लाख रुपैयाँ हात पारेको हो । उपविजेताले ६० हजार रुपैयाँ पायो ।

घोडादौड उपाधि देवेन्द्र श्रीपालीले जिते । निर्धारित ९ किमी दुरी २२ मिनेट ३९ सेकेण्डमा पूरा गर्दै उनले उपाधि चुमेका हुन् । कृष्ण थापा दोस्रो, विनोद थापा तेस्रो भए । विजयीले क्रमशः ५५ हजार, २७ हजार र ११ हजार रुपैयाँ पुरस्कार प्राप्त गरे । ठेलोमा स्याङ्जाका दुजिक थापामगर प्रथम र पर्वतका युवराज गुरुङ दोस्रो भए । उनीहरुले ८ हजार र ५ हजार पुरस्कार पाए ।

घान्द्रुकमा हाल ७० व्यवस्थित होटल र १७ होमस्टे सञ्चालित छन् ।