पोखरा । नेपाली कांग्रेसका नेता खेमराज पौडेलको निधन भएको छ । शुक्रबार बिहान उपचारका क्रममा पोखराको फेवासिटी अस्पतालमा उनको निधन भएको हो । ८१ वर्षे पौडेल फोक्सोको क्यान्सरबाट ग्रसित थिए ।

उनी कास्कीको तत्कालीन पुम्दीभुम्दी गाविस हाल पोखरा महानगरपालिका २२ पुम्दीमा बस्दै आएका थिए । पौडेल विद्यार्थीकाल देखि नै प्रजातान्त्रिक आन्दोलनमा सामेल हुँदै आएका थिए ।

उनको शुक्रबार नै अन्त्येष्टि गरिने भएको छ । अन्त्येष्टि अगाडि उनको शव केहीबेर नेपाली कांग्रेसको पार्टी कार्यालयमा राखिने भएको छ । पौडेलका १ पत्नी, २ छोरा र २ छोरी छन् ।

लामो समय निरन्तर राजनीतिमा खटिए पनि लाभको पदमा भने उनी पुगेनन् । तत्कालीन पर्यटन मन्त्री रवीन्द्र अधिकारीको हेलिकोप्टर दुर्घटनामा निधन भए पछि रिक्त कास्की निर्वाचन क्षेत्र नम्बर २ मा प्रतिनिधिसभा सदस्यको उपनिर्वाचनमा उनले टिकट पाएका थिए । उनी एमालेकी विद्या भट्टराईसँग पराजीत भएका थिए ।