पोखरा । बृहत फेदीखोला पोखरा सम्पर्क समाजले नयाँ वर्ष २०८१ को उपलक्ष्यमा शुभकामना आदानप्रदान तथा संस्थाले प्रकाशन गरेको भित्तेपात्रो लोकार्पण गरेको छ ।

कार्यक्रमको उद्घाटन गर्दै संस्थाका आजीवन सदस्य तथा अक्षयकोषदाता शिक्षासेवी यामबहादुर रानाभाटले समाजले स्थापना गर्नुको उद्देश्य अनुरुप नै गतिविधिहरु भइरहेकोमा खुसी व्यक्त गरेका थिए ।

संस्थाका अध्यक्ष जगदीश लामिछानेले नियमित कार्यक्रम अन्तरगत नै क्यालेन्डर प्रकाशन गरेको बताउँदै हरेक कार्यक्रम गर्दा उपसमिति गठन गरि हरेक कार्यसमितिका सदस्यलाई संस्थाप्रति उत्तरदायी बनाउने प्रयास गरिएको जनाए । उनले उपसमिति गठन गरी कार्य गर्दा गतिविधिहरु पनि धेरै गर्न सकिएको र हरेक व्यक्ति सक्षम हुँदै गएको बताए । उनले गैर नाफामूलक गैरसरकारी संस्था भएको कारण मितव्ययिता अपनाउन कार्य समिति र सल्लाहकारबीच मात्रै कार्यक्रम गरिएको बताए ।

सो अवसरमा समाजको द्वितीय उपाध्यक्ष लाल कार्की अन्जान, कोषाध्यक्ष राजकुमार क्षेत्री लगायतले शुभकामना मन्तव्य राखेका थिए ।