पोखरा। गण्डकी प्रदेशमा एमाले संसदीय दलका नेता खगराज अधिकारीलाई मुख्यमन्त्री नियुक्ति बदर माग गर्दै सर्वोच्च अदालतमा रिट दायर भएको छ ।

गण्डकी प्रदेशसभाका सदस्य एवं कांग्रेस संसदीय दलका नेताको हैशियतमा सुरेन्द्रराज पाण्डेले मंगलबार सर्वोच्चमा उत्प्रेषणयुक्त परामादेशसमेत रिट दायर गरेका हुन् । पोखरा लामाचौर घई घर काठमाडौं निवासी सम्झना केसीलाई वारेस बनाएर प्रदेश प्रमुख डिल्लीराम भट्ट, प्रदेश प्रमुखको कार्यालय, गण्डकी प्रदेश समेत ४ जनालाई विपक्षी बनाइएको छ । रिटमा नेपालको संविधानको धारा ४६ तथा १३३ (२)(३) बमोजिम उत्प्रेषण परमादेश लगायतको जो चाहिने उपयुक्त आज्ञा, आदेश पूर्जी जारी गरी पाउँ भन्ने माग गरिएको छ ।

‘विपक्षीहरुले आफूलाई हकै नपुग्ने विषयमा अधिकार क्षेत्रात्मक त्रुटि गरी कार्य गर्नुभएको, अधिकारको प्रयोग गर्दा प्रवृत्त भावना लिई गलत ढंगले प्रयोग गरेको निजहरुको बद्नियत र स्वेच्छाचारिताका कारणले निवेदक मेरा उपर भेदभाव/अन्याय हुन पुगेको, विपक्षीहरुका प्रत्येक काम काबराहीहरु छलकपटपूर्ण भएको,’ निवेदनमा माग दाबी गरिएको छ, ‘मुलुकको संविधान कानुन र स्थापित नजीर परम्परा विपरीत देखिएकोले विपक्षी खगराज अधिकारीलाई मुख्यमन्त्रीको जिम्मेवारीमा रही कामकाज गर्न रोकी म निवेदकलाई नै उक्त प्रदेशको मुख्यमन्त्री पदमा निरन्तरता दिन अन्तरिम आदेशसहितको उत्प्रेषणयुक्त परमादेश समेतको आदेश जारी गरी पाउँ ।’

गत २५ चैतमा सभामुखसमेतको समर्थनमा एमाले संसदीय दलका नेता अधिकारीले मुख्यमन्त्रीमा दाबी गरेपछि प्रदेश प्रमुख भट्टले नेपालको संविधान १६८(२) बमोजिम उनलाई नियुक्त गरेका हुन् । नवनियुक्त मुख्यमन्त्री अधिकारीले सोही दिन पद तथा गोपनीयताको सपथ लिनुका साथै ३ सदस्यीय मन्त्रिमण्डल बिस्तार गरिसकेका छन् ।

गत वर्षको चुनाव लगत्तै करिब ३ महिना मुख्यमन्त्री बनेका अधिकारीपछि यसै वर्षको २०८० वैशाख १५ मा पाण्डे मुख्यमन्त्री बनेका थिए । गत २३ फागुनमा माओवादीले समर्थन फिर्ता लिएकोमा उनले विश्वासको मत गुमाउने सक्ने आकलनमा गत २१ चैतमा पदबाट राजीनामा दिएका थिए ।