पोखरा । को–अपरेटिभ प्रेसिडेन्ट सोसाइटी (कोप्स सेन्टर) आयोजनामा भएको निबन्ध प्रतियोगितामा मदरल्याण्ड माविका छात्र शाश्वत रेग्मी प्रथम भएका छन् ।

६७ औं राष्ट्रिय सहकारी दिवस अवसरमा ‘आजको सहकारी, उत्पादनमा साझेदारी’ र ‘सहकारी समस्या, चुनौती र समाधान’ शीर्षकमा १६ चैतमा भएको प्रतियोगितामा कक्षा ९ पढ्ने उनी प्रथम भएका हुन् ।

कास्कीमा ९ देखि १२ कक्षासम्म विद्यार्थीबीच भएको प्रतियोगितामा विन्ध्यवासिनी मावि बाटुलेचौरकी बन्दना बिक दोस्रो, भद्रकाली माविकी सविना श्रीपाली तेस्रो र जनचेतना माविका सक्षम बिक सान्त्वना भएको को–अपरेटिभ प्रेसिडेन्ट सोसाइटी (कोप्स सेन्टर) का अध्यक्ष डिल्लीराम बरालले बताए । उनीहरुलाई दिवस अवसरमा मंगलबार पोखरा सभागृहमा हुने एक समारोहबीच नगदसहित पुरस्कृत गरिनेछ । प्रथमले १०, दोस्रोले ७, तेस्रोले ५ र सान्त्वनाले ३ हजार साथमा प्रमाणपत्र पाउनेछन् । शिवालय माविका प्रअ रुपिन्द्र प्रभावी कटु निर्णायक रहेको प्रतियोगिताको संयोजक सविन जिसी थिए ।

यसपालि सहकारी दिवस ‘सहकारीमा सुशासन : प्रविधि र एकीकरण’ नाराका साथ मनाइँदैछ ।