पोखरा । पत्रकार गंगाधर पराजुलीलाई वर्ष २०७९ को पोखरा पत्रकारिता सम्मान प्रदान गरिएको छ । नेपाल पत्रकार महासंघको ६९ औं स्थापना दिवस अवसरमा शुक्रबार नेपाल पत्रकार महासंघ कास्कीले उनलाई ५० हजार ५ सय ५५ रुपैयाँसहित सम्मान गरेको हो । यस्तै वर्ष २०८० को सोही नामको संस्थागत सम्मान पोखरा फूलबारीका राजु भण्डारी एवं भण्डारी परिवारलाई अर्पण गरियो । भण्डारी नेपाल पत्रकार महासंघका पूर्व कोषाध्यक्षसमेत हुन् । भण्डारी परिवारले महासंघ कास्कीको संस्थागत विकासमा सहयोग पु¥याएको छ ।

गण्डकी प्रदेशका मुख्यमन्त्री सुरेन्द्रराज पाण्डेले उनीहरुलाई सम्मान गरे ।

सम्मानित पराजुलीले पुरस्कारले पत्रकारिता क्षेत्रमा कमल चलाउन हौसला बढेको बताए । ‘म केही समय अघिसम्म पत्रकारितामा सक्रिय थिएँ । पछिल्लो समय केही निस्क्रिय जस्तै थिएँ,’ उनको भने, ‘यो पुरस्कारले यही क्षेत्रमा रहिरहनुपर्छ भनेर हौसला मिलेको छ ।’

अर्का सम्मानित भण्डारीले सम्मानले पत्रकारिता क्षेत्रसँग परिवारको निकटता झनै बढेको बताए । पत्रकार महासंघ कास्की अध्यक्ष विमला भण्डारीको अध्यक्षतामा भएको कार्यक्रममा विभिन्न वक्ताले सम्मानितलाई बधाई दिँदै पत्रकारको हकहितको पक्षमा बोलेका थिए । कार्यक्रममा स्वागत उपाध्यक्ष जमुना वर्षा शर्मा र सञ्चालन सचिव माधव बरालले गरेका थिए ।