पोखरा । पोखरामा विश्व रंगमञ्च दिवस कविता मञ्चन कार्यक्रम गरेर मनाइएको छ । पोखरा थिएटर आयोजनामा ‘रंगमञ्चमा कविता’ कार्यक्रममा कवि राजु स्याङ्तानका तीन कविता मञ्चन गरिएको हो ।

नारायण न्यौपानेको परिकल्पना र निर्देशनमा भएको मञ्चन कार्यक्रममा न्यौपाने सहित कुमार तामाङ र ज्यास्मिन नेपालीले कविता वाचन गरेका थिए । कवितामाथि रंगकर्मी रमेशबाबु तिमल्सिना, रोशनी रामदाम, अनुशा परियार, मिलन श्रेष्ठ र रोहित पौडेलले अभिनयकला देखाए ।

कार्यक्रममा नेपाल संगीत तथा नाट्य प्रज्ञा प्रतिष्ठानका पूर्व कुलपति सरुभक्त श्रेष्ठले रंगमञ्च दिवसको विश्व सन्देश वाचन गरे । रंगमञ्चका विविध पक्षबारे पोखरा प्रज्ञा प्रतिष्ठान कुलपति पदमराज ढकाल, जिल्ला प्रहरी कार्यालय कास्कीका प्रहरी नायव उपरीक्षक श्रवणकुमार बिक, संस्कृतिकर्मी डा. तुलसी प्रभास, शिक्षाविद् अरुणा शेरचन, पोखरा थिएटर अध्यक्ष परिवर्तन, इन्द्रेणी थिएटर अध्यक्ष केदारनाथ पौडेल, रेनेसा थिएटर अध्यक्ष एमडी काफ्ले, पद्यमा थिएटरका सुमन कार्की, पोखरा थिएटरका संस्थापक सदस्य दिलप्रसाद गुरुङ र सञ्चारकर्मी रघुनाथ वाग्लेले भनाइ राखे ।