पोखरा, १० चैत । नेकपा (एमाले) कास्कीको ११ औं जिल्ला अधिवेशन शनिबारदेखि पोखरामा सुरु भएको छ । नयाँबजारस्थित प्रदर्शनी केन्द्रमा आयोजित उद्घाटन समारोहमा अध्यक्ष केपी शर्मा ओली नआएपछि महासचिव शंकर पोखरेलले अधिवेशन उद्घाटन गरे ।
स्वास्थ्य अनुकूल नभएपछि पूर्व प्रधानमन्त्री समेत रहेका पार्टी अध्यक्ष ओली नआएको स्रोतले जनायो । जारी उद्घाटन समारोहमा बोल्ने वक्ताले पार्टी एकतामा जोड दिँदै मिसन–८४ सफल पार्नुपर्ने बताएका छन् ।

२ दिनसम्म चल्ने अधिवेशनको दोस्रो दिन आइतबार बन्दसत्र लगायत चुनावी कार्यक्रम पोखरा सभागृह हलमा हुनेछन् । आगामी २ वर्षका लागि १२२ सदस्यीय नयाँ नेतृत्व चयन गर्ने जिल्ला अध्यक्ष मनबहादुर गुरुङले बताए । त्यसमा १२ जना पछि मनोनीत हुने छन् ।

अधिवेशनमा ९ सय ३५ जना प्रतिनिधिले भाग लिएका छन् । कास्कीका ७२ वटा वडा, जनसंगठन, सल्लाहकार परिषद्, इलाका कमिटी शाखा लगायतबाट उनीहरु छानिएका हुन् । अधिवेशनमा जिल्ला अध्यक्ष मनबहादुर गुरुङले राजनीतिक, सचिव बैनबहादुर अधिकारीले संगठनात्मक र कोष तथा वित्त व्यवस्थापन विभाग प्रमुख चिरञ्जीवी पोखरेलले आर्थिक प्रतिवेदन प्रस्तुत गर्नेछन् ।

कास्की जिल्ला अधिवेशनमा नयाँ नेतृत्व छानिदै गर्दा पृथ्वीसुव्वा गुरुङ र खगराज अधिकारी प्यानल नेतृत्वमा आ–आफ्नो दाबी गरेका छन् । शनिबार साँझसम्म सर्वसम्मत् प्रयास सफल नभए आइतबार मतदान प्रक्रियामा जाने सम्भावना छ ।