पोखर । पोखराको मित्रमिलन सहकारीको कार्यक्षेत्र विस्तार गर्न घुस लिएको आरोपमा पक्राउ परी पुर्पक्षका लागि कारागार रहेका सहकारी रजिस्ट्रारको कार्यालय गण्डकीका पूर्व रजिस्ट्रार उदयबहादुर पराजुलीलाई धरौटीमा छाड्न उच्च अदालत पोखराले आदेश दिएको छ ।

न्यायाधीहरु राजनप्रसाद भट्टराई र धनसिंह महराको संयुक्त इजलाशले पराजुलीलाई २० लाख र सहकारीका लेखा समिति सदस्य जनकराज पौडेललाई ७ लाख रुपैयाँ धरौटीमा छाड्न बिहीबार आदेश गरेको हो । जिल्लाले गरेको आदेश उपर चित्त नबुझेपछि पराजुली रिट लिएर उच्च पुगेका थिए ।

पुस ११ गते कुश्मा नगरपालिकाको कार्यालयबाटै पक्राउ परेका उनी जिल्ला अदालतको आदेशपछि कारागार चलान भएका थिए । उनी नेपाल सरकारका उपसचिव हुन् ।  मित्र मिलन सहकारीका अध्यक्ष रमण पौडेल र प्रवन्धक किरण अधिकारीको बयानका आधारमा उनी पक्राउ परेका थिए ।

पौडेल र अधिकारी दुवै हाल कारागारमा छन् । गत कात्तिक ४ पक्राउ परेका सहकारीका अध्यक्ष पौडेल र प्रबन्धक अधिकारीले स्याङ्जामा कार्यक्षेत्र विस्तार गर्न रजिस्ट्रारलाई एक करोड २५ लाख रुपैयाँ घुस दिएको बयान दिएका थिए ।