पोखरा । चापापानी सिद्धार्थ बचत तथा ऋण सहकारी संस्था, पोखरा १२ पुरानोधाराले सहकारी शिक्षा कार्यक्रम गरेको छ ।

सहकारी रजिष्ट्रारको कार्यालय गण्डकी प्रदेशका रजिष्ट्रार भेषराज रिजालले सहकारीका सदस्यलाई सहकारीबारे जानकारी दिँदै नाफाको पछि सहकारी हिंडेका सहकारी जुन प्राइभेट किसिमले चलेका छन्, त्यस्ता सहकारीहरू जोखिममा रहेको बताए ।

सहकारीका संस्थापक अध्यक्ष तथा संस्थाका संरक्षक नरेशबहादुर कार्कीले कास्कीका राम्रा भनेर चिनिने सहकारीहरुमध्ये चापापानी उत्कृष्ट सहकारी भएकोले सदस्यलाई आफ्नै सहकारीमा आर्थिक कारोबार गरी संस्थालाई बलियो बनाउनुपर्ने बताए ।

सहकारीका अध्यक्ष दीपक कार्कीले आगामी दिनमा खराब ऋणलाई कानुनी उपचार गरी उठाउन लागिएको बताउँदै सहकारीको मूल्य, मान्यता अनुसार चापापानी सहकारी चलेको बताए ।

सहकारी अध्यक्ष दीपक कार्कीको अध्यक्षतामा सम्पन्न कार्यक्रममा उपाध्यक्ष श्यामप्रसाद साखीले स्वागत मन्तव्य व्यक्त गरेका थिए । व्यवस्थापक करुणा शाहीले सहकारीको हालसम्मको वित्तीय अवस्थाबारे जानकारी गराएकी थिइन् ।

कार्यक्रममा सहकारीका शिक्षा संयोजक मनोहरि पौडेलले सहकारीका सात सिद्वान्त वाचन गरेका । सहकारी सचिव इन्दिरा भण्डारी कोइरालाले कार्यक्रम सञ्चालन गरेकी थिइन् ।