पोखरा । पोखरेली युवा सांस्कृतिक परिवार (पोयुसाप) लाई सर्वज्ञमान विष्णुदेवी संस्कृति पुरस्कार २०८० अर्पण गरिने भएको छ ।

भैरव सांस्कृतिक संरक्षण समितिले प्रदान गर्ने यो वर्षको पुरस्कार पोयुसापलाई प्रदान गरिने निर्णय गरिएको भैरव सांस्कृतिक संरक्षण समितिका अध्यक्ष तीर्थमान प्रधानांगले जानकारी दिए । पोखरालाई साहित्य, संस्कृति र कलाको राजधानी बनाउन पोयुसापले प्रशंसीय कार्य गरेकाले पुरस्कार अर्पण गर्न लागिएको उनले बताए ।

१ लाख १ रुपैयाँ नगद राशि र सम्मानपत्र रहेको यो पुरस्कार फागुन २६ गते कार्यक्रमका गरी अर्पण गरिने उनले जानकारी दिए । यसभन्दा अघि यो पुरस्कार फत्तेमान, सत्यमोहन जोशी, अम्बर गुरुङ, प्रेमध्वज प्रधान, जगमान गुरुङले प्राप्त गरिसकेका छन् ।

विष्णुदेवी संस्कृति पुरस्कार २०८० का पोयुसापालाई छनोट गरेकोमा पोखरेली युवा सांस्कृतिक परिवारका अध्यक्ष उपेन्द्र पौडेलले भैरव सांस्कृतिक संरक्षण समितिलाई धन्यवाद दिए । ‘खुसी बाँडे बढ्छ भन्छन् ।

त्यसैले यो पत्रले ल्याएको खुसी तपाईंहरू सबैमाझ बाँड्न चाहेँ,’ उनले सामाजिक सञ्जालमा लेखेका छन्, ‘धेरै धन्यवाद श्री भैरव सांस्कृतिक संरक्षण समितिलाई ! बधाई छ पोखरेली युवा सांस्कृतिक परिवारका सम्पूर्ण संस्थापक, पूर्व अध्यक्षहरू तथा पूर्व तथा वर्तमान कार्यसमिति, आजीवन सदस्य, सल्लाहकार एवम् शुभचिन्तकहरूमा ! बधाई हामीलाई ।’