पोखरा । अन्नपूर्ण गाउँपालिका–६, लुम्लेको भीरमा आइतबारदेखि लागेको आगलागी अझैसम्म नियन्त्रणमा आएको छैन । आइतबार दिउँसो स्थानीय गुप्तेभीरबाट सुरु आगलागीले पश्चिममा चन्द्रकोट तथा पूर्वतर्फ दार काट्ने खोल्सो (अष्टेलियन क्याम्प) नजिकैसम्मको भिरालो वन क्षेत्र नष्ट गरिसकेको छ ।

आगलागीकै कारण निर्माणाधीन लान्द्रुक अन्नपूर्ण बृहत् खानेपानी योजनाका लाखै मूल्य पर्ने पाइप, जेनेरेटर तथा अन्य सामग्री जलेर नष्ट भएका छन् । हाल पनि त्यहाँका विभिन्न ठाउँ तथा खरबारीमा आगलागी भइरहेको छ ।

आगो नियन्त्रणमा लिन सयौं स्थानीयवासी, मालेपाटनस्थित सशस्त्र प्रहरी बल, नागडाँडा प्रहरी चौकी एवं नयाँपुल प्रहरी चौकीबाट जनशक्ति खटिएको भए पनि अप्ठेरो भीरका कारण हालसम्म नियन्त्रणमा लिन नसकिएको वडाध्यक्ष एकदेव देवकोटाले बताए ।

आगलागी कसरी भयो भन्ने खुल्न सकेको छैन ।