पोखरा । गण्डकी प्रदेश सरकार र पोखरा महानगरपालिकाले आठौं संस्करणको पोखरा स्पोर्ट्स अवार्डलाई यसपालि पनि साथ दिने भएका छन् ।

नेपाल खेलकुद पत्रकार मञ्च गण्डकीले खेलाडीको सम्मानका निम्ति बर्सेनि आयोजना गर्दै आएको उक्त अवार्डमा सहयोग लागि मञ्चको टोलीसँग भेटमा उक्त प्रतिबद्धता जनाएको मञ्च अध्यक्ष दीननाथ बरालले बताए ।

मञ्च अध्यक्ष बराल नेतृत्वको टोलीसँग प्रदेशकी सामाजिक विकास तथा स्वास्थ्य मन्त्री सुशीला सिंखडाले अवार्ड सफल पार्न विगतमा झैं सहयोग गर्ने प्रतिबद्धता जनाएकी हुन् । यस्तै, पोखराका मेयर धनराज आचार्यले सहयोगलाई निरन्तरता दिने प्रतिबद्धता जनाएका छन् । उक्त अवार्ड गण्डकी प्रदेशको खेल क्षेत्रको लागि महत्वपूर्ण इभेन्ट भएको र प्राविधिक कारणवश रातो किताबमा समावेश हुन नसकेको भए पनि सहयोग निरन्तर रहने बताएका थिए ।

मञ्चले २०७२ सालदेखि सञ्चालन गर्दै आएको अवार्डमा यसपालि ७ विधामा अवार्ड प्रदान गरिने छ । जसमा लाइफटाइम अचिभमेन्ट अवार्डसहित वर्ष खेलाडी पुरुष, वर्ष खेलाडी महिला, उत्कृष्ट प्रशिक्षक, उदीयमान खेलाडी, खेलकुद संघसंस्था वा क्लब र खेल पत्रकारलाई अवार्ड प्रदान गरिने मञ्चका महासचिव राजाराम पौडेलले जनाए । मञ्चले आगामी वैशाखमा पोखरा सभागृहमा उक्त समारोह गर्दैछ ।