पोखरा । सामुदायिक सेवा केन्द्र एवं सामुदायिक प्रहरी सेवा पोखरा १२, माटेपानीको आयोजनामा मंगलबार भएको रक्तदान कार्यक्रममा कुल ६६ युनिट रगत संकलन भएको छ ।

कार्यक्रम शुभारम्भ गर्दै कास्की प्रहरी प्रमुख, प्रहरी उपरीक्षक मोहनकुमार थापाले रक्तदान महादान भएको उल्लेख गर्दै सामुदायिक सेवा केन्द्रले सराहनीय कार्य गरेको औँल्याए । पोखरा ११ का वडाध्यक्ष प्रेमप्रसाद कर्माचार्यले सामुदायिक सेवा केन्द्र माटेपानीले रचनात्मक गतिविधिलाई प्राथमिकता दिँदै आइरहेको स्मरण गर्दै रक्तदान मानवीय सेवाको कार्य भएको धारणा राखे ।

केन्द्रका अध्यक्ष धर्मराज आचार्यले सबैको साथ सहयोगबाट केन्द्रले गतिविधि सञ्चालन गरिरहेको स्पष्ट पार्दै आगामी दिनमा पनि यस्ता गतिविधिलाई निरन्तरता दिने प्रतिबद्धता जनाए ।

कार्यक्रममा सामुदायिक सेवा केन्द्र जिल्ला समन्वयका वरिष्ठ उपाध्यक्ष ज्ञानेन्द्र बजगाईं, केन्द्रका निवर्तमान अध्यक्ष मीरादेवी आचार्य, पूर्व अध्यक्ष बलबहादुर कार्की, लायन्स क्लब अफ पोखरा गतिशील स्टारका अध्यक्ष नवराज पौडेल लगायतले पनि भनाइ राखे ।

प्रादेशिक रक्तसञ्चार सेवा केन्द्र पोखराको प्राविधिक सहयोगमा कार्यक्रम भएको हो । जसमा लायन्स क्लब अफ पोखरा गतिशील स्टार, युनिटी टोल विकास संस्था, आमा समूह, जनएकता युवा क्लब तथा रेडक्रस उपशाखा पोखरा १४ को सहयोग रह्यो ।

केन्द्रका अध्यक्ष आचार्यको अध्यक्षतामा भएको कार्यक्रममा उपाध्यक्ष शिवप्रसाद बरालले स्वागत, सदस्य कोपिला श्रीसले कार्यक्रम संयोजन एवं सचिव बाबुराम सापकोटाले सञ्चालन गरे ।