पोखरा। साठी प्लस बुढा तन्नेरी ब्याडमिन्टन क्लब आयोजनामा पोखरामा मेन्स डबल राष्ट्रिय ब्याडमिन्टन प्रतियोगिता–२०८० हुने भएको छ । यो प्रतियोगिता पोखरामै पहिलो पल्ट हुन लागेको हो ।

पोखरा स्पोट्र्स एन्ड व्याडमिन्टन क्लब (सिरमोर हल) मा १२ फागुन शनिबार सो प्रतियोगिता हुने बुधबार पत्रकार भेटघाटमा क्लब अध्यक्ष रुद्रबहादुर घलेले बताए । उनका अनुसार प्रतियोगितामा देशभरबाट २४ टिमले भाग लिने छन् ।

विजेता जोडीले ३० हजार र उपविजेता जोडीले २० हजार साथमा ट्रफी, मेडल र प्रमाणपत्र प्राप्त गर्ने छ । तेस्रो हुने २ जोडीलाई समान १० हजार साथमा ट्रफी, मेडल र प्रमाणपत्र वितरण गरिने प्रतियोगिता संयोजक श्यामकृष्ण श्रेष्ठले बताए ।

क्लब सल्लाहकार माधव पहारीले व्याडमिन्टन खेलको प्रबद्र्धन गर्न आफूहरु एकजुट भएको बताए । खेलबाट आपसमा भाइचारा वृद्धि हुने क्लबले विश्वास लिएको उनको भनाइ छ ।

क्लबमा राष्ट्रिय तथा अन्तर्राष्ट्रिय खेल खेलिसकेका खेलाडीहरु पनि सदस्य हुने क्लब सचिव दुर्गाबहादुर गुरुङले बताए । बुढा तन्नेरी क्लबमा आजीवन २३ र साधारण ७ गरी ३० जना आबद्ध छन् ।

यो प्रतियोगितामा पोखरा अल्पाइन एन्ड स्प्रिङ होटल होटल पाटर्नर हो ।