पोखरा । पोखरा रामबजारस्थित भारतीय दूतावास पेन्सन वितरण कार्यालयमा इन्टर बटालियन भूपू भलिबल प्रतियोगिता–२०२४ सुरु भएको छ । आगामी १७ फागुनसम्म सञ्चालन हुने सो प्रतियोगितामा १८ टिमले भाग लिएका छन् ।

बुधबार एक समारोहबीच कार्यालय प्रमुख लेफ्टिनेन्ट कर्णेल प्रशान्त बघेलले रेफ्री हितकुमार गुरुङलाई बल हस्तान्तरण गरी प्रतियोगिता उद्घाटन गरे । शारीरिक तथा मानसिक विकाससहित भूपूहरुबीच आपसी भेटघाट एवं भाइचारा सम्बन्ध विकासमा खेलले सघाउ पुग्ने उनको भनाइ छ ।

६/८ जिआर र २/८ जिआरबीच उद्घाटन खेलमा सोझो सेटमा ६/८ जिआर विजयी भयो । २५–१७, २५–१७ र २५–१० सेटमा उसले खेल जितेको हो । पहिलो दिनमा भएका ३ खेलमध्ये दोस्रोमा १/१ जिआर र तेस्रोमा २/५ जिआर विजयी भए । आफ्नो अनुपस्थितिमा २/९ जिआरले १/१ जिआरलाई र ५/१ जिआरले २/५ जिआरलाई वाकओभर दिएको धनवीर गुरुङले जानकारी दिए ।

उद्घाटन समारोहमा भूपू कर्णेल कृष्णबहादुर खत्री, एसबिआई बैंक गण्डकी प्रदेश प्रमुख मीनबहादुर गुरुङ, एभरेस्ट बैंक गण्डकी प्रदेश प्रमुख सुधीर गौतम, भूपू सैनिक परिवार लगायत उपस्थित थिए ।

दोस्रो दिन बिहीबार पहिलो खेल ३/५ जिआर र २/१ जिआरबीच प्रतिस्पर्धा हुनेछ । दोस्रो खेलमा १/९ जिआर र उद्घाटन खेल विजेता ६/८ जिआरबीच हुनेछ । प्रतियोगितामा १/५ जिरआर, ३/९ जिआर, ५/९ जिआर, ४/८ जिआर, आसाम राइफल्स, ५/५ जिआर, ४/४ जिआर, ४/५ जिआर, ३/८ जिआर र पिपिओले समेत भाग लिएको भारतीय दूतावास पेन्सन वितरण कार्यालयका भरतभूषण पाण्डे (बिबि पाण्डे) ले बताए ।

पाँचौं संस्करणको यो प्रतियोगिता विजेतालाई ५० हजार र उपविजेतालाई ३५ हजार पुरस्कार प्रदान गरिने आयोजकले जनाएको छ । विजेताको पुरस्कार प्रायोजन एसबिआई बैंक र उपविजेताको पुरस्कार प्रायोजक एभरेस्ट बैंक लि.ले गरेको छ ।