पोखरा । पोखरा–५, मालेपाटनस्थित हिलसाइड इङ्लिस माध्यमिक विद्यालयको २९ औं वार्षिकोत्सव, अभिभावक दिवस एवं पुरस्कार वितरण समारोह सोमबार सम्पन्न भयो ।

समारोह उद्घाटन गर्दै वडाध्यक्ष विष्णुप्रसाद बरालले हिलसाइड वडाकै नमुना विद्यालय भएको जनाए । उनले अध्ययनलाई जागिरसँग नजोड्न सुझाव दिए । वार्षिकोत्सव विद्यार्थी तथा अभिभावकको चाड भएको उल्लेख गर्दै उनले आफ्नो क्षमता चिन्न विद्यार्थी समच्छे आग्रह गरे ।

एनप्याब्सन कास्की अध्यक्ष हेमन्त अधिकारीले विकासमा शिक्षाको भूमिका महत्वपूर्ण हुने उल्लेख गर्दै संस्कारयुक्त शिक्षा आजको आवश्यकता भएको धारणा राखे । त्यस अवसरमा महानगर शिक्षा अधिकृत रामप्रसाद तिवारी, वाराही माविका प्रधानाध्यापक शिवप्रसाद भण्डारी, अभिभावक सुरज पौडेल लगायतले पनि भनाइ राखे ।

कार्यक्रमबीच उत्कृष्ट शिक्षकको रुपमा अनिता पौडेल र दीपा क्षत्री एवं उत्कृष्ट कर्मचारीको रुपमा तारा क्षत्री र रामबहादुर मगर सम्मानित भए । विद्यार्थीले विभिन्न प्रस्तुति देखाए भने ८ विद्यामा विद्यार्थी पुरस्कृत भए ।

पूर्व  प्रअ नारायणप्रसाद भण्डारीले घर जस्तो विद्यालय र विद्यालयजस्तो घर निर्माण गर्नुपर्ने भन्दै विद्यार्थीमा माया, सद्भाव, हार्दिकता तथा प्रेम जागरण गर्नुपर्ने उल्लेख गरे ।

प्रअ आरती सुवेदीले विद्यालय प्रतिवेदन पेश गर्दै छिट्टै प्लस टु सञ्चालन गर्ने तयारी भइरहेको स्पस्ट पार्दै गुणस्तर वृद्धि गर्न विद्यालय प्रयासरत रहेको सुनाइन् ।

विद्यालय उपाध्यक्ष डिल्लीराम पराजुलीको अध्यक्षतामा भएको उक्त कार्यक्रममा प्रधानाध्यापक भण्डारी तथा विद्यार्थी एञ्जल लामिछानेले स्वागत, विद्यालय निर्देशक लीलाप्रसाद पराजुलीले धन्यवाद ज्ञापन एवं शिक्षक मीनप्रसाद सुवेदीले सञ्चालन गरे ।

कक्षा नर्सरीदेखि १० सम्म सञ्चालित विद्यालयमा हाल ५ सय ५० विद्यार्थी पढ्छन् ।