पोखरा। मित्र मिलन सहकारी ठगी प्रकरणका प्रतिवादी पोखरा वडा २१ का वडाध्यक्ष दीपकप्रसाद सुवेदी धरौटीमा रिहा भएका छन् । कास्की जिल्ला अदालतका न्यायाधीश चन्द्रकान्त पौडेलको इजलासले मंगलबार वडाध्यक्ष सुवेदीलाई ८ लाख धरौटीमा रिहा गर्ने आदेश दिएको हो । लामो समयदेखि फरार उनी मंगलबार अदालत हाजिर भएका थिए । उनले मिटरव्याजी कारोबारी र राजस्व छली गरेको अभियोग छ ।

मित्रमिलन सहकारी ठगी मुद्दा जिल्ला अदालतमा विचाराधीन छ । सहकारी ठगी अभियोगमा ३३ जना प्रतिवादीविरुद्ध पक्राउ पुर्जी काटिएकोमा हालसम्म अदालतले वडाध्यक्ष सुवेदीसहित ७ जनालाई धरौटीमा छाड्न आदेश दिएको छ । आइतबारमात्रै कानुनी सल्लाहकार जनकल्याण पराजुली ३ लाख धरौटीमा रिहा भएका थिए । यसअघि, सुरेशकुमार श्रेष्ठ, हरेराम भण्डारी, लेखा समितिका संयोजक सूर्यबहादुर अधिकारी, विष्णुप्रसाद भण्डारीलाई जनही ७ लाख र पूर्वअध्यक्ष कृष्णबहादुर राउतलाई १२ लाख रुपैयाँमा धरौटीमा छाड्न अदालतले आदेश दिएको छ । पक्राउ परेकोमध्ये ६ जना पुर्पक्षका लागि कारागारमा छन् ।

थुनामा रहेकामा सहकारी अध्यक्ष रमण पौडेल, प्रमुख कार्यकारी अधिकृत किरण अधिकारी, पूर्व रजिस्ट्रार उदयबहादुर पराजुली, सहकारी सञ्चालक सदस्य गोपाल खनाल, सल्लाहकार शेयर सदस्य राजु बराल र सेयर सदस्य बुद्धिसागर पौडेल हुन् । अझै १९ जना फरार छन् ।

जिल्ला सरकारी वकिल कार्यालयले प्रतिवादीविरुद्ध कानुनबमोजिम सजाय र ३१ करोड ७८ लाख २२ हजार ८ सय ११ रुपैयाँ बिगो माग दाबी गरी मुद्दा दायर गरेको थियो ।