पोखरा । पोखारको महेन्द्रपुलमा अन्तर्राष्ट्रिय झन्डा पार्क निर्माण गरिएको छ । लायन्स क्लब इन्टरनेश्नलको करिब ७० लाख आर्थिक सहयोगमा पोखरा महानगरपालिकाले उक्त पार्क निर्माण गरेको हो । प्रजातन्त्र दिवसको दिन सोमबार उक्त पार्क उद्घाटन गरियो ।
लायन्स क्लब इन्टरनेशनलका ५ वटा डिष्ट्रिक्टको ७० लाख भन्दा बढी आर्थिक सहयोगमा निर्मित झन्डापार्कको पोखरा महानगरपालिका प्रमुख धनराज आचार्य र लायन्स क्लब इन्टरनेशनलका डाइरेक्टर बालकृष्ण बुर्लाकोटीले संयुक्त रुपमा सोमबार उद्घाटन गरे । उद्घाटनसँगै पार्कको सम्पूर्ण स्वामित्व पोखरा महानगरलाई हस्तान्तरण गरियो । बुर्लाकोटीले मेयर आचार्यलाई पार्कको साँचो हस्तान्तरण गरेका हुन् ।
चार तहको प्यारा फिट शैलीमा निर्माण गरिएको पार्कमा संयुक्त राष्ट्र संघमा आबद्ध १ सय ९३ देशको नामसहितका पोलमा झन्डाहरू राखिएका छन् । पार्कको सबैभन्दा अगाडि नेपालको झन्डा राखिएको छ भने, एक स्थानमा पत्रपत्रिका अध्ययन केन्द्र र अर्को स्थानमा डिजिटल अध्ययन केन्द्र पनि स्थापना गरिएको छ । सात महादेशको भिन्न–भिन्न ब्लकहरू छुटाइएको पार्कमा दोस्रो विश्वयुद्ध पछि विश्वशान्ति स्थापना र मानव अधिकार प्रवद्र्धनका लागि स्थापित संयुक्त राष्ट्र संघमा आबद्ध देशहरूको आबद्धताको मिति समेत उल्लेख गरिएको छ । पार्कमा संयुक्त राष्ट्र संघ, पोखरा महानगरपालिका, लायन्स क्लब अन्तर्राष्ट्रिय र एनआरएनएको झन्डा पनि राखिएको छ । ती झन्डाहरु एकै पटक फहराउँदा पोखरेलीले नौलो अनुभूति गरेका छन् । फोटो खिच्दै कतिपयले यो नयाँ पर्यटकीय गन्तव्य बनेको अथ्र्याएका छन् ।
झन्डा पार्कमा संयुक्त राष्ट्र संघमा आबद्ध १९३ देशका झन्डा फहराएका छन्
लायन्स इन्टरनेश्नल डिस्ट्रिक्ट ३२५ आइ, जे, के, एल र एमको सहयोगमा करिब १ वर्ष लगाएर उक्त पार्क निर्माण भएको महानगरका प्रमुख प्रशासकीय अधिकृत श्यामकृष्ण थापाले बताए ।
समारोहमा मेयर आचार्यले झन्डापार्क पोखराको लागि नयाँ पर्यटकीय गन्तव्य बनेको दाबी गरे । उनले पोखराको समग्र विकासमा सहकार्य गर्न सबै संघसंस्थालाई आह्वान गरे । ‘कुनै पनि देशको राष्ट्रिय झन्डा त्यस देशको राष्ट्रिय एकता र गौरवको प्रतीक हो । झन्डा पार्क केवल रमाइलोका लागि मात्र होइन लर्निङ सेन्टरका रूपमा पनि रहनेछ,’ प्रमुख आचार्यले भने । उनका अनुसार यस आसपासको क्षेत्रलाई वाई फाई फ्री जोन बनाइएको छ । सरकार महानगर एक्लैको प्रयासले मात्र विकास सम्भव नभएको भन्दै उनले झन्डापार्क निर्माणमा लायन्स क्लब अन्तर्राष्ट्रियले सहयोगेजस्तै यहाँको पर्यटकीय एवं पूर्वाधार विकासमा समेत हातेमालो गर्न आह्वान गरे । पोखरा घुम्न आउने विश्वका पर्यटकले अब आफ्नै देशको झन्डामुनि बसेर फोटो खिच्न सक्ने उनको भनाइ छ ।
लायन्स क्लब इन्टरनेशनलका डाइरेक्टर बुर्लाकोटीले पोखराको अन्तर्राष्ट्रिय बजारमा प्रचारप्रसारका लागि यसले महत्वपूर्ण सहयोग पुग्ने बताए । संसारभरी सेवामा समर्पित लायन्सहरुको गौरवका रूपमा पोखरामा निर्माण गरिएको अन्तर्राष्ट्रिय झन्डा पार्क सम्बन्धित देशका पर्यटकहरूका लागि गर्वको विषय हुने उनले बताए । पोखराको विकास र समृद्धिको यात्रामा लायन्स क्लब अन्तर्राष्ट्रिय स्थानीय सरकारसँग सहकार्य र समन्वय गर्न सदैव तयार रहेको उनको भनाइ छ ।
पोखरा २ का वडा अध्यक्ष दिवसमान प्रधानाङ्गले झन्डा पार्कले पोखराको नयाँ पर्यटन गन्तव्य बन्ने विश्वास व्यक्त गरे । पोखरा ९ का वडाध्यक्ष दीपेन्द्र मर्सानीले झन्डा पार्क महानगरको नेतृत्वले देखेको एउटा जीवित सपना भएको बताए । आफूहरूको कार्यकाल केवल रातो र कालो मसीको केराइमा केन्द्रित नगर्ने बताए ।
पोखरा महानगरपालिकाका प्रमुख प्रशासकीय अधिकृत श्यामकृष्ण थापाले झन्डा पार्कमा राखिएका संयुक्त राष्ट्र संघमा आबद्ध सबै देशका झन्डाहरूले विश्व भातृत्व प्रवद्र्धनको सन्देश दिएको बताए । विश्वमा शान्ति कायम र मानवअधिकारको रक्षा तथा प्रवद्र्धनमा यसले महत्वपूर्ण सन्देश दिएको उनको दाबी छ ।
संयुक्त राष्ट्र संघमा आबद्ध १ सय ९३ सहित संयुक्त राष्ट्रसंघ, पोखरा महानगरपालिका, लायन्स र एनआरएनएको समेत गरी १ सय ९७ झन्डाहरू एकै स्थानमा राखिएको छ । यहाँ झन्डापार्कसहित शौचालय, फल्चा, मड्का चिया सप, पत्रपत्रिका एवं डिजिटल डिस्प्ले लगायतका संरचना हुने छन् ।
महेन्द्रपुलको अर्को भागमा गैरआवासीय नेपाली संघ (एनआरएनए) सहयोगमा यसअघि अत्याधुनिक सार्वजनिक शौचालय निर्माण भइसकेको छ । हाल त्यस स्थानमा बायो ग्यासको डाइजेस्टर जडान कार्य भइरहेको जनाइएको छ ।
सेती नदी किनार महेन्द्रपुल बजारमा यसअघि रहेको पोखरा सार्वजनिक पुस्तकालय तथा पोखरा आर्ट ग्यालरीको भवन मासेर झन्डापार्क बनाइएको हो । उक्त कार्यको भने कतिपयले आलोचना गरेका छन् । पुस्तकालयका करिब १२ हजार पुस्तक नयाँबजारस्थित क्षत्री समाज भवनमा लगिएको छ ।
महानगरले पृथ्वीचोकस्थित पुरानो ट्राफिक कार्यालय रहेको स्थानमा कोसेली घर निर्माण गरी त्यहाँ पुस्तकालय सार्ने तयारी गरेको छ । गत वर्ष महानगर नगरकार्यापालिकाको आठौं बैठकले पुस्तकालय तथा आर्ट ग्यालरीमा डोजर चलाएर पार्क बनाउने निर्णय गरेको थियो ।
Related News
सम्बन्धित समाचार
पत्रकार पोखरेल सम्मानित
रेवान पोखरामा विश्वराज
फिल्म ‘ईश्वर’ प्रदर्शन सुरु
कर्जा विस्तार हुनेगरी मौद्रिक नीति ल्यायौंः गभर्नर अधिकारी
बेनी–जोमसोम सडक अवरुद्ध
hero news full width
मुख्य समाचार
गायक तथा गीतकार एलपी जोशी रहेनन्
आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१राइड सेयरिङविरुद्ध पोखराका यातायात व्यवसायीको आन्दोलन
श्रावण १०, २०८१जहाज सि चेकका लागि पोखरा आउँदै थियो
श्रावण ९, २०८१