पोखरा । धनञ्जय गोत्रीय भण्डारी समाज, पोखरा २१, निर्मलपोखरी, खर्च्याङको १६ औं वार्षिक साधारणसभा सम्पन्न भएको छ ।

कार्यक्रममा समाजको वंशावली उपसमिति संयोजक, पूर्व केन्द्रीय सदस्य एवं पोखरा १७ का वडा सदस्य शिवराम भण्डारीको प्रमुख आतिथ्यमा भएको कार्यक्रममा करिब १ सय ६० जनाको सहभागिता थियो ।

कार्यक्रममा समाज अध्यक्ष यज्ञप्रसाद भण्डारीले अध्यक्षको प्रतिवेदन र कोषाध्यक्ष हरिशंकर भण्डारीले कोषाध्यक्षको प्रतिवेदन प्रस्तुत गरेका थिए ।

समाजका सदस्य नेत्रप्रसाद भण्डारी, पूर्व सहसचिव ओमप्रसाद भण्डारी, पूर्व कोषाध्यक्ष एवं केन्द्रीय उपाध्यक्ष टीकाराम भण्डारी, संस्थापक अध्यक्ष शोभाखर भण्डारीले शुभकामना मन्तव्य व्यक्त गरेका थिए ।

सदस्यका छोराछोरीतर्फ गत वर्षको एसइई र कक्षा १२ को परीक्षामा सर्वोत्कृष्ट अंक ल्याउनेलाई सम्मान गरिएको छ । सम्मानित हुनेमा एसइईतर्फ प्रसन्न भण्डारी, सन्ध्या भण्डारी, राजेश भण्डारी तथा कक्षा १२ तर्फ अर्पण भण्डारी र गुमा भण्डारी रहेको कार्यक्रम संयोजक देवीमाया भण्डारीले बताइन् । साथै, कुल मन्दिर निर्माणमा सहयोग गर्ने व्यक्तित्वहरुलाई समेत सम्मान गरिएको थियो ।

संस्थाका अध्यक्ष यज्ञप्रसाद भण्डारीको अध्यक्षतामा भएको कार्यक्रममा सहसचिव शालिकराम भण्डारीले स्वागत र सचिव नवराज भण्डारीले संचालन गरेका थिए ।

२०६० सालमा स्थापित संस्थामा धनञ्जय गोत्रीय भण्डारी समाजका करिब साढे २ सय सदस्य आबद्ध छन् ।