पोखरा । गण्डकी प्रदेशका आर्थिक मामिलामन्त्री जितप्रकाश आले मगरले पछिल्लो समय नेपाली समाज नकरात्मकतर्फ उन्मुख भएकोप्रति चिन्ता व्यक्त गरेका छन् । शुक्रबार नेपाल तेक्वान्दो संघ गण्डकीको तेस्रो वार्षिक साधारण सभा उद्घाटन गर्दै उनले हरेक कुरा नकारात्मक तरिकाले मात्रै लिने गरिएकोमा नकारात्मकभित्र पनि सकारात्मक विषयबस्तु आंैल्याउनुपर्ने बताए । उनले प्रदेश सरकारले सिमित स्रोतसाधनका कारण खेलकुदका विभिन्न गतिविधिमा मन फुकाएर सहभागी हुन नसके पनि केही न केही हिसाबले जोडिइरहेको बताए ।

गण्डकी प्रदेश सभा सदस्य गणेशमान गुरुङले नेपाललाई अन्तर्राष्ट्रिय क्षेत्रमा चिनाउन तेक्वान्दो खेलको ठूलो भूमिका रहेको बताए । संघले पोखरामा केही महिनापहिला गरेको माउन्ट एभरेस्ट च्याम्पियनसिपले सुस्ताएको पोखराको पर्यटन प्रवद्र्धनमा योगदान पुगेकोमा प्रशंसा गरे ।

संघका केन्द्रीय महासचिव दीपराज गुरुङले नेपालमा तेक्वान्दो खेलको इतिहासबारे जानकारी दिए । उनले संख्यात्मक हिसाबमा धेरै मेडल भित्र्याउन सफल तेक्वान्दो सफल भएको दाबी गर्दै मुलुकको सान र नेपाली जनताको इज्जत राख्न संघ सफल भएको दाबी गरे ।

नेपाल ओलम्पिक कमिटीका उपाध्यक्ष एवं प्रदेश खेलकुद परिषद् गण्डकीका निवर्तमान सदस्यसचिव तेजबहादुर गुरुङले खेल क्षेत्र र खेलाडीका कारण राष्ट्रको इज्जत धानिरहेको अवस्थामा बजेट निर्माणक्रममा राज्यको आखा पर्न नसकेकोप्रति गुनासो गरे ।

कास्कीका प्रमुख जिल्ला अधिकारी बासुदेव अधिकारीले तेक्वान्दो संघले देश र जनताको अन्तर्राष्ट्रिय पहिचान बनाउन सफल भएको बताए ।

तेक्वान्दो संघ गण्डकी अध्यक्ष जगनबहादुर गुरुङले प्रविधिमैत्री तेक्वान्दो खेल विकास आजको आवश्यकता रहेको बताए । उनले खेल पदकमात्र नभई जीवनपद्दति, अनुशासन, राष्ट्रिय एकता, स्वास्थ्य, विज्ञान लगायतका पाटोबाट हेरिनुपर्नेमा जोड दिए ।

कार्यक्रममा संघका महासचिव रमेश पौडेलले महासचिवको प्रतिवेदन पेस गर्दै तेक्वान्दो खेल विकासमा सबै संवेदनशील भएर लाग्नुपर्ने बताए । तेक्वान्दो संघ गण्डकी अध्यक्ष जगनबहादुर गुरुङको अध्यक्षतामा भएके कार्यक्रममा पोखरा पर्यटन परिषद्का पूर्व अध्यक्ष बासुदेव त्रिपाठी, संघ उपाध्यक्ष कमल पराजुली लगायत बोलेका थिए ।