कास्की बारमा गोविन्दलाई हराउँदै भगवती विजयी

आदर्श समाज सम्वाददाता
माघ २६, २०८०
kaski bar bhagwati pahari

पोखरा । कास्की जिल्ला अदालत बार एसोसिएसन अध्यक्षमा भगवती पहारी निर्वाचित भएकी छन् । जिल्ला बारले पहिलो पल्ट महिलाको नेतृत्व पाएको हो ।

शनिबार बारको १६ औं वार्षिक साधारणसभा तथा सातौं अधिवेशनमा अध्यक्षका प्रत्यासी गोविन्द पौडेललाई ३१ मतअन्तरले पराजित गर्दै पहारी आगामी २ वर्षका लागि निर्वाचित भएकी हुन् ।

कुल खसेको ८३ मतमा पहारीले ५३ र पौडेलले २२ मत प्राप्त गरे । पहारी एमालेनिकट प्रगतिशील तथा पेसागत कानुन व्यवसायी संगठन (पिपिएलए) र पौडेल माओवादीनिकट गणतान्त्रिक पेसागत कानुन व्यवसायी संगठन (आरपिएलए) बाट चुनाव लडेका थिए ।

विगतको अभ्यासमा झैं उच्च र जिल्ला बारमा एमाले र कांग्रेसनिकट कानुन व्यवसायीहरुको चुनावी सहमति भएको थियो । कांग्रेसनिकटको डेमोक्रेटिक लयर्स एसोसिएन (डिएलए) लाई उपाध्यक्ष, सहसचिव र ४ सदस्य दिएर एमालेले पूर्वसहमति गरेको थियो । तर माओवादीनिकट आरपिएलएको असन्तुष्टिका कारण मतदानबाटै कार्यसमिति टुंगो लगाइएकोमा सबै पदमा ऊ पराजित भएको छ ।

चुनावी परिणामअनुसार उपाध्यक्षमा डिएलएकी गीता आचार्य लम्साल निर्विरोध भइन् । सचिवमा पिपिएलएका कृष्णकुमार श्रेष्ठ ५७ मत ल्याएर निर्वाचित हुँदा आरपिएलए वेदनाथ भण्डारीले २७ मत मात्र ल्याए । सहसचिवमा डिएलएकी प्रीति पाण्डे निर्विरोध भइन् ।

कोषाध्यक्षमा पिपिएलकी विनाका शर्मा ४६ मतसहित निर्वाचित हुँदा आरपिएलएका विमलप्रसाद लामिछानेले २६ मत ल्याए ।

सदस्यमा गणेशबहादुर आले, शंकर सैजु, ईश्वर परियार, अनुप पौडेल, शान्तिकुमारी ढुंगाना, पुरुषोत्तम राज घिमिरे, प्रदीपकुमार राना, हेमराज अधिकारी निर्वाचित भएको अधिवक्ता विष्णुप्रसाद अधिकारीले बताए ।

शुक्रबार बिहान ११ देखि ३ बजेसम्म मतदान भएको थियो । जिल्ला बारमा १ सय १ मतदाता थिए ।  मुक्ति सापकोटा संयोजकत्वको निर्वाचन समितिले चुनाव गराएको हो ।

Related News

सम्बन्धित समाचार

hero news full width