पोखरा उद्योग वाणिज्य संघ ७० वर्षमा प्रवेश

आदर्श समाज सम्वाददाता
माघ २५, २०८०
pcc

पोखरा । पोखरा उद्योग वाणिज्य संघ ७० वर्षमा प्रवेश गरेको छ । उद्योगी/व्यवसायीहरुको हितको रक्षा गर्ने उद्देश्यले अमृतप्रसाद शेरचनको अध्यक्षतामा २०११ साल माघ २५ गते संघको स्थापना भएको थियो । यो पोखराको सवैभन्दा जेठो सामाजिक संस्था पनि हो ।

उद्योगी/व्यवसायीहरुको हितका खातिर स्थापना भए पनि संघले पोखराको शैक्षिक, सामाजिक र भौतिक विकासमा महत्वपूर्ण योगदान गरेको छ ।

यहाँको बालमन्दिरदेखि पृथ्वीनारायण क्याम्पस, पोखरा विश्वविद्यालयसम्मका दर्जनौं शैक्षिक संस्थाको स्थापना र सञ्चालनमा सघाएको संघले महेन्द्रपुल,पोखरा सभागृह, काहुँको धरहरादेखि सिद्धार्थ राजमार्ग निर्माण पनि गरेको संघका वर्तमान अध्यक्ष पवनकुमार प्रजापतिले जनाए ।

यस्तै, पोखरा अन्तर्राष्ट्रिय विमानस्थल निर्माणको लागि निरन्तरको पैरवी तथा २०६९ सालमा रिले अनसनको नेतृत्व पनि संघले नै गरेको थियो ।

स्थापना दिवस अवसरमा बिहीबार संघको सचिवालयमा झण्डोत्तोलन गरिएको छ । कार्यक्रममा संघका वर्तमान अध्यक्ष प्रजापतिसहित पूर्व अध्यक्षहरु राजेन्द्रकुमार लालचन, कृष्णमोहन श्रेष्ठ र विश्वशंकर पालिखे, वर्तमान पदाधिकारी तथा कार्यसमिति सदस्यको उपस्थिति रहेको संघका महासचिव बलराम आचार्यले बताए ।

Related News

सम्बन्धित समाचार

hero news full width