पोखरा । बेलायतको स्कटल्यान्ड राज्यको एबरडीनमा भएको आगलागीमा परी नेपाली दिदीबहिनीको निधन भएको छ । सोमबार साँझ ब्ल्याक हिल्टन रोडमा लागेको सो आगलागीमा परी शिक्षा सुवेदी र आँचल सुवेदीको निधन भएको ढिलागरी समाचार सार्वजनिक भएको हो ।

स्थानीय एबरडीन लाइभका अनुसार शिक्षा २४ र आँचल २८ वर्षकी थिइन् । सुवेदी दिदीबहिनी पोखरा विश्वविद्यालयका पूर्व प्राध्यापक डा. यज्ञप्रसाद सुवेदीका छोरीहरु हुन् । सुवेदीको पुख्र्यौली घर पर्वत हो भने हाल उनका परिवारका सदस्य पोखरा बस्छन् । शिक्षा आइटी अध्ययन गरी क्यान अफसोरमा कार्यरत थिइन् भने आँचल पेसाले इन्जिनियर हुन् । सो आगलागीमा परी घाइते अरु ५ जना भने उपचारपछि घर फर्किसकेका छन् ।

उक्त घटनाबारे स्कटल्यान्ड प्रहरीले अनुसन्धान गरिरहेको जनाइएको छ । सोमबार साँझ करिब ६ बजे आगलागीबारे प्रहरीले जानकारी पाएको र एम्बुलेन्स, दमकल लगायत आकस्मिक सेवाका १४ वटा साधन त्यहाँ परिचालित भएको जनाएको छ ।

सुवेदी दिदीबहिनी दोस्रो तल्लामा बस्थे । आगलागी पहिलो तलाबाट सुरु भएको थियो ।
आगलागी भएको थाहा पाएपछि उनीहरु आफ्नो फ्लाटको ढोका बन्द गरी बाहिर निस्कन खोज्दा भ¥याङमै धूँवाको मुस्लोमा परी निस्सासिएर मृत्यु भएको आशंका छ ।