स्याङ्जा । स्याङ्जा जिल्ला उद्योग वाणिज्य संघको ३८ औं साधारणसभा तथा १६ औं अधिवेशनले महादेव श्रेष्ठको अध्यक्षतामा १७ सदस्यीय समिति निर्वाचित गरेको छ ।

मंगलबार राति सम्पन्न अन्तिम मतगणनामा अध्यक्षका निकटतम् प्रतिस्पर्धी हिक्मत श्रेष्ठलाई मात्र ८ मतले पछि पार्दै उनी निर्वाचित भएका हुन् । महादेवले १ सय ४९ मत ल्याउँदा हिक्मतको १ सय ४१ मत आयो ।

निकै प्रतिस्पर्धा रहेको निर्वाचनमा अध्यक्ष पदका ४ उम्मेदवार थिए । अर्का प्रत्यासी राजप्रसाद घिमिरेले १ सय २ र नारायणप्रसाद ढकालले ६८ मत प्राप्त गरेको निर्वाचन समितिले जनाएको छ ।

वरिष्ठ उपाध्यक्षमा भीमकुमार श्रेष्ठ, महासचिवमा रवीन्द्र केसी, कोषाध्यक्षमा दीपेन्द्रकुमार श्रेष्ठ निर्वाचित भए । महासचिवमा ३ र अन्यमा २÷२ जनाबीच प्रतिस्पर्धा भएको हो ।

सदस्यमा हिटलर पौडेल, अमृत लामिछाने, मीनाकुमारी सुवेदी, सुदर्शन रेग्मी, छायादत्त सापकोटा, सूर्यप्रसाद शर्मा लामिछाने, कौशिला पौडेल (करुणाा), राजेन्द्र श्रेष्ठ निर्वाचित भएको निर्वाचन अधिकृत हरिप्रसाद रेग्मीले जानकारी दिए ।

वाणिज्य, उद्योग र महिलातर्फ उपाध्यक्षमा क्रमशः शाखालिद मियाँ, दीपककुमार श्रेष्ठ र गंगा प्रधान निर्विरोध निर्वाचित भए । सहकोषाध्यक्ष र सहसचिवमा भने उम्मेदवारको योग्यता नपुग्दा दुवै पद रिक्त रहे ।

संघका ५ सय ८७ मतदाता (नवीकरण गरिएका) मध्ये ४ सय ७५ मत खसेको थियो ।

२०१३ सालमा स्थापित स्याङ्जा जिल्ला उद्योग वाणिज्य संघ केन्द्रीय संघको संस्थापक सदस्य पनि हो ।