पोखरा । निजी अस्पतालहरुको संगठन (अफिन) गण्डकीको पाँचौं साधरण सभा शनिबार पोखरामा भएको छ । साधारणसभाको छेकोमा अग्रज स्वास्थ्यकर्मीलाई सम्मान गरिएको अफिन गण्डकी सचिव ऋषि खतिवडाले बताए ।

गण्डकी प्रदेश सामाजिक विकास तथा स्वास्थ्य मन्त्री सुशीला सिंखडाको प्रमुख आतिथ्यमा र अफिन गण्डकीको अध्यक्ष डा. गिरधारि शर्माको अध्यक्षतामा सम्पन्न कार्यक्रममा अग्रज स्वास्थ्यकर्मीहरुलाई दीर्घ सेवा सम्मान अर्पण गरिएको हो ।

चिकित्सक तर्फबाट डा. सोमत सिंह तुलाधर, नर्सिङ तर्फबाट प्रा.भगवती केसी, ल्याब तर्फबाट चेतबहादुर गुरुङ, फार्मेसी तर्फबाट खडानन्द शर्मा र रेडियोलोजी तर्फबाट उदयकान्त तिवारी सम्मानित भएका छन् ।

८६ वर्षीय डा. सोमत लामो समय गण्डकी अस्पतालमा मेडिकल सुपरिटेन्डेन्ट भएका काम गरेका थिए । अफिन गण्डकीले पोहोरबाट फरक ५ क्षेत्रका अग्रजलाई सम्मान गर्न थालेको हो ।

जिन्दगीका आफ्ना सक्रिय दिनहरू स्वास्थ्य सेवामा समर्पित स्वास्थ्यकर्मीहरुलाई सम्मान गर्न पाउँदा अफिन गण्डकीले गौरव महसुस गरेको सचिव खतिवडाले बताए । अफिन गण्डकीमा विभिन्न स्तरका ३२ अस्पताल आबद्ध छन् ।