पोखरा । पोखरा उद्योग वाणिज्य संघअन्तर्गत सञ्चालित सामाजिक विकास केन्द्रले पोखराका १९ सरकारी तथा सामुदायिक विद्यालयका ३ सय २५ जना विद्यार्थीलाई न्यानो कपडा र शैक्षिक सामग्री सहयोग गरेको छ ।

उनीहरुलाई स्वीटरसहित स्टेसनरी एवं झोला प्रदान गरेको सामाजिक विकास केन्द्रकी लेखा प्रमुख सरिता ताम्राकारले बताइन् ।

कार्यक्रममा पोउवा संघ अध्यक्ष पवनकुमार प्रजापति, पूर्वअध्यक्ष तथा सामाजिक विकास केन्द्र संयोजक राजेन्द्रकुमार लालचन, वरिष्ठ उपाध्यक्ष गोकर्ण कार्की, कोषाध्यक्ष दिनेश बास्तोला, उपमहासचिव शोभा गौतमलगायतले विद्यार्थीलाई ती सामग्री हस्तान्तरण गरे ।

कार्यक्रममा पोउवा संघ अध्यक्ष प्रजापतिले पढ्न पाउने अधिकार सुनिश्चिततासहित उनीहरुको आवश्यकता पूर्तिका लागि यस्ता पूनीत कार्यको निरन्तरताको कामना गरे ।
सामाजिक विकास केन्द्रका संयोजक राजेन्द्रकुमार लालचनले न्यून आय भएका परिवारका सदस्य विद्यार्थीलाई सामाजिक उत्तरदायित्वहन गर्दै ती सामग्री प्रदान गरिएको बताए ।

कार्यक्रम संयोजक प्रीति पाण्डेले अधिकांश बालबालिकाको आवश्यकता हेरेर नै सहयोग सामग्री प्रदान गरिएको बताइन् ।

सामाजिक विकास केन्द्रका सुपरभाइजर सफल बरालले शैक्षिक सत्रको सुरुमा पनि १ सय ४२ जना छात्रासहित २ सय ४७ जनालाई शैक्षिक सामग्री सहयोग गरिएको स्मरण गरे ।

उनका अनुसार लायन्स क्लब अफ ब्यूटी र लेकसिटी सहकार्यमा थप १ सय बालबालिकालाई पनि स्टेसनरी सामग्री वितरण गरिएको थियो ।