पोखरा । कास्कीको लेखनाथमा गत २४ मंसिरमा कार ठक्करबाट स्कुटरमा सवार २ जना युवतीको मृत्यु भएको घटनामा कार चालक मानबहादुर बानियाँ पुर्पक्षका लागि कारागार चलन भएका छन् ।

सवारी ज्यानसम्बन्धी मुद्दामा कास्की जिल्ला अदालतका न्यायाधीश ऋषिराम आचार्यको इजलासले आइतबार उनलाई पुर्पक्षका लागि थुनामा पठाउने आदेश दिएको हो । उक्त घटनामा डिल्लीराम बरालसमेतले चार चालक बानियाँलाई विपक्षी बनाई उजुरी दिएका थिए ।

पृथ्वी राजमार्गअन्तर्गत लेखनाथको सुन्दरीबजारमा कारले स्कुटरलाई ठक्कर दिँदा गण्डकी मेडिकल कलेजमा अध्ययनरत् पोखरा २५, हेमजाकी २३ वर्षीया अनिशा खड्का र पोखरा ५, जिरो किमीकी २४ वर्षीया भावना बरालको मृत्यु भएको थियो ।

पोखराबाट तालचोकतर्फ जाँदै गरेको बिएए ००४१ नम्बरको कारले विपरीत दिशाबाट आउँदै गरेको ग १३ प ३५७८ नम्बरको स्कुटरलाई उक्त दिन दिउँसो ४ बजेर १५ मिनेटमा ठक्कर दिएको हो ।

यसैबीच, उक्त मुद्दामा आइतबार अदालतमा थुनछेक बहस हुने थाहा पाएपछि आरोपीलाई रिहा नगर्न नहुने माग गदै मृतकका आफन्त, आमा समूह, क्लब तथा स्थानीयले अदालतमा नाराबाजी गरेका थिए । हेमजाकी गीता केसीले चालकको लापरबाहीले होनहार छोरीचेलीको मृत्यु हुनु दुःखद भएको बताउँदै दोषीलाई हदैसम्मको कारबाही हुनुपर्ने बताइन् ।