पोखरा । पोखराको पृथ्वीचोकमा रोकिराखेको बस शुक्रबार राति एक्कासी हरायो । पार्किङमा राखेको बस त्यो ठाउँमा नहुँदा हल्लीखल्ली हुने नै भयो । गाडीवालाले तुरुन्तै प्रहरीलाई खबर गरे ।

ग१ख ९६३८ नम्बरको बस चोरी भएको सूचना जब प्रहरीले पायो, तब कास्की प्रहरीले मातहत प्रहरी कार्यालय तथा अन्य प्रहरी कार्यालयमा जानकारी गरायो । बस नम्बरसहित जानकारी पाएकाले राजमार्गहरुमा प्रहरी चनाखो भएको बसेका थिए । त्यही नम्बरको गाडी चितवनको आँपटारीमा शनिबार बिहानपख देखियो ।

गाडी रोकेर प्रहरीले सोधपुछ गर्ने नै भयो । गाडीमा चालक थिए, तनहुँको म्याग्दे ३ का १७ वर्षे बालक । १७ वर्षे बालकसँग लाइसेन्स त हुने कुरै भएन । प्रहरीले उनलाई पक्राउ गरी गाडी नियन्त्रणमा लियो । ती बालकले किन र के प्रयोजनका लागि गाडी लगेका हुन त्यो भने खुल्नै बाँकी छ ।

कास्की प्रहरीले जिल्ला अदालत कास्कीबाट म्याद थपेर डाँका चोरी मुद्दामा अनुसन्धान थालेको छ ।