पोखरा । गोल्डेन साकोसको १५ औं वार्षिकोत्सवको अवसरमा दृष्टिविहीनलाई सहयोग गरिएको छ । कास्की जिल्ला नेत्रहीन संघमा आबद्ध नेत्रहीनहरुलाई २० ग्रस पेन्सिल, ६ सय डट्पेन र २५ जोड जाडोमा लगाउने चप्पल गरी ६० हजार रुपैयाँ बराबरको सामग्री हस्तान्तरण गरिएको छ ।

सामाजिक उत्तरदायित्व कार्यक्रम अन्तर्गत ती सामग्री प्रदान गरिएको सहकारीले जनाएको छ । संस्थाका तर्फबाट अध्यक्ष कृष्णप्रसाद पोख्रेलले शुक्रबार सहयोग सामाग्री हस्तान्तरण गरेका हुन् ।

संस्थाका कोषाध्यक्ष कृष्णप्रसाद सञ्चालन गरेको कार्यक्रममा स्वागत गण्डकी प्रदेश नेत्रहीन संघका अध्यक्ष लक्ष्मण सुवेदीले गरेका थिए ।

कार्यक्रममा संस्थाका सञ्चालक मोतिप्रसाद पौडेल, विमला आचार्य, दीलमाया पौडेल सुवेदी, ध्रुवकुमार महत, विनय सुवेदी र संस्थाका प्रवन्धक दीपक पन्त सहभागी थिए ।

संस्थाको सेयर पुँजी ९ करोड ५४ लाख ५४ हजार छ भने बचत ४० करोड ३१ लाख, ऋण लगानी ४४ करोड ७८ लाख र सेयर सदस्य संख्या २ हजार ३ सय ४४ जना छन् ।

कुल सम्पत्ति ५८ करोड ६६ लाख रहेको संस्थाको प्रधान कार्यालय सिर्जनाचोक र सेवाकेन्द्र बिरौटामा छ । संस्थाले वार्षिकोत्सवका अवसरमा प्रत्येक वर्ष यसरी नै सामाजिक उत्तरदायित्वका कार्यक्रम सञ्चालन गर्दै आएको अध्यक्ष पोख्रेलले बताए ।