१९ औं लेखनाथ महोत्सवमा ९० लाख आम्दानी लक्ष्य

आगामी ५ देखि १६ पुससम्म महोत्सव

रामशरण नेपाली
मंसिर १८, २०८०
Lekhnath Mahotsav News

लेखनाथ। लेखनाथ उद्योग वाणिज्य संघले पुस पहिलो सातादेखि १९ औं लेखनाथ महोत्सव गर्ने भएको छ । आगामी ५ देखि १६ पुसम्म पोखरा २७, तालचोकमा महोत्सव गर्न लागिएको सोमबार पत्रकार सम्मेलनमा जानकारी दिइयो ।

संघ अध्यक्ष एवं महोत्सवका मूल संयोजक विनोद श्रेष्ठले २०५८ सालदेखि सुन्तला प्रदर्शनीबाट सुरु गरेको महोत्सवलाई समयानुकूल परिस्कृत गर्दै २०६१ सालदेखि वार्षिक रुपमा लेखनाथ महोत्सव गर्दै आएको बताए । उनले विभिन्न जातजाति भाषाभाषीलाई एकै थलोमा उपस्थित गराएर लेखनाथ क्षेत्रको पहिचान गराउने उद्देश्यले महोत्सवको आयोजना गरिएको बताए । उनले महोत्सवको माध्यबाट यस क्षेत्रमा उत्पादित वस्तुहरुको बजारीकरण गर्ने, कृषि सामग्री एवं महिला उद्यमीहरुको उत्पादनहरुको प्रदर्शनी एवं बिक्री गरिने बताए ।

करिब ३ सय ३५ स्टल रहने महोत्सवको २ लाख ५० हजार दर्शकले अवलोकन गर्ने लक्ष्य छ । साथै करिब ९ करोड बराबरको आर्थिक कारोबार हुने आयोजकले अनुमान गरेका छन् । महोत्सवमा करिब ९० लाख आम्दानी भइ १० लाख बचत हुने अनुमान छ ।

महोत्सव प्रचारप्रसार संयोजक उपेन्द्रराज सुवेदी ‘राजु’ले कोभिड १९ र युक्रेन युद्धका कारण विश्वभर आएको आर्थिक मन्दीबाट थला परेको अर्थतन्त्र चलायमान बनाउन तथा पर्यटन प्रवद्र्धन गर्न, देशमा रहेका औद्योगिक उत्पादनलाई बढवा दिन, हस्तकलाका सामानहरुको बजार प्रवद्र्धन र सोको पहिचान, स्थानीय उत्पादन, लघु, घरेलु तथा साना उद्योगहरुको प्रवद्र्धन, आवश्यक ज्ञान, सिप, उद्यमशिलता र प्रविधि हस्तान्तरण, राष्ट्रिय तथा अन्तर्राष्ट्रिय मुलुकहरुमा उत्पादित औद्योगिक एवं दैनिक उपभोग्य वस्तु तथा सेवाहरुको प्रवद्र्धन, जातीय भेषभुषा, कला संस्कृति, रीतिरिवाजको जगेर्ना गर्न, आन्तरिक एवं वाह्य पर्यटकहरु आकर्षण गरि आन्तरिक पर्यटनलाई सहयोग पु¥याउने महोत्सवको मुख्य उद्देश्य रहेको बताए ।

उनले महोत्सवका विशेष कार्यक्रमहरुमा कवि लेखनाथ पौडेलको सम्झनामा साहित्यिक कार्यक्रम, महिला विशेष तथा रीतिरिवाज जर्गेना अन्तर्गत रत्यौली कार्यक्रम, विद्यालयस्तरीय कार्यक्रम, सांस्कृतिक कार्यक्रम, आदिवासी जनजाति

विशेष कार्यक्रम, जातजातिहरुको सम्मानमा लोप हुन लागेका रीतिरिवाज तथा संस्कृति झल्कने उत्कृष्ट नृत्य प्रदर्शनी, आदिवासी जनजाति तथा आमा/महिला समूहहरुको झाँकी, ¥याली तथा भेषभूषा प्रदर्शनी, हास्यव्यंग्य कलाकारको दैनिक प्रस्तुति, कृषि तथा पशुपंक्षी प्रदर्शनी, सूचना प्रविधि प्रदर्शनी, राष्ट्रिय उत्पादन प्रदर्शनी, शैक्षिक प्रदर्शनी, हस्तकला प्रदर्शनी, बालउद्यान, खाना महोत्सव, राष्ट्रिय लोकदोहोरी कार्यक्रम, लाइभ म्युजिक कन्सर्ट हुनेछ ।

महोत्सवको बचतबाट प्रदर्शनी स्थल र संघको भवनको स्तरोन्नति, औद्योगिक क्षेत्र निर्माणको लागि पहल एवं सहयोग, कविशिरोमणि लेखनाथ पौड्यालको जन्मस्थल विकास, पर्यटन विकासतर्फ वेगनासतालमा वराह मन्दिर संरक्षण, स्थानीय महिला तथा युवा उद्यमीद्वारा उत्पादित वस्तुहरुको प्रवद्र्धनका लागि उत्कृष्टस्तरको कोसेली घर निर्माण, संघद्वारा वेगनासतालमा निर्माण गरिएको लेटर बोर्डको परिसरमा चेम्बर पार्क निर्माण लगायतका विभिन्न सामाजिक उत्तरदायित्वका कार्यमा खर्च गरिने आयोजकले जनायो ।

कार्यक्रममा नेपाल पत्रकार महासंघ केन्द्रीय सदस्य सरिता तिमिल्सिना पगेनी, पत्रकार महासंघ कास्की अध्यक्ष विमला भण्डारीले महोत्सवको माध्यमबाट स्थानीय उत्पादनको प्रवद्र्धन गरिनुपर्नेमा जोड दिउ । उनले आर्थिक संकटको अवस्थामा महोत्सवको माध्यमबाट व्यवसायीलाई उत्प्रेरित गर्नेखालका कार्यक्रमहरु गर्न सके राम्रो हुने सुझाव दिए ।

महोत्सव सहसंयोजक एवं प्रायोजक व्यवस्थापन तथा उपसमिति परिचालन समितिका संयोजक राजेन्द्र ओझाले लेखनाथ महोत्सवलाई स्थानीयले चाडपर्वको रुपमा लिंदै आएको र उत्पादक र उपभोक्ताहरुलाई एकै ठाउँमा भेला गरी आर्थिक चलायमान गराउन महत्वपूर्ण भूमिका खेलेको दाबी गरे ।

संघ अध्यक्ष विनोद श्रेष्ठको अध्यक्षतामा भएको कार्यक्रमको सञ्चालन महासचिव जानुका पराजुलीले र धन्यवाद ज्ञापन वरिष्ठ उपाध्यक्ष राजेन्द्र ओझाले गरेका थिए ।

Related News

सम्बन्धित समाचार

hero news full width