पोखरा । स्टेप बाइ स्टेप माविमा ३५ औं वार्षिक खेलकुद प्रतियोगिता आइतबार सुरु भएको छ । विद्यालयका संस्थापक निर्देशक रमाकान्त बरालको सभापतित्वमा सञ्चालित शुभारम्भ कार्यक्रममा विद्यालयका संस्थापक प्रिन्सिपल निर्मला बरालले खेलकुद शिक्षक इच्छा गुरुङलाई खेलकुद सामग्री हस्तान्तरण प्रतियोगिताको उद्घाटन गरिन् ।

प्रतियोगिताको पहिलो दिन भलिबल, टेबल टेनिस, टग अफ वार (डोरी तान्ने खेल), म्युजिकल चियार, चम्चा दौड, बेलुन फुटाइ, मिठाईं दौड आदि प्राराम्भिक चरणका खेलहरु सम्पन्न भए । आइतबार सम्पन्न छात्रा भलिबलमा न्युटन हाउस प्रथम र ग्यालिलियो हाउस द्वितीय भयो । छात्रा बास्केट बलमा न्युटन सदन प्रथम हुँदा आइन्स्टाइन सदन द्वितीय भयो । छात्र बास्केटबलमा मर्कोनी सदन प्रथम र ग्यालिलियो सदन द्वितीय भयो ।

विद्यालयका संस्थापक निर्देशक रमाकान्त बरालले विद्यालयले स्वास्थ्यका लागि खेल भन्ने उद्गारलाई मनन गर्दै विद्यार्थीहरुलाई खेलकुदको माध्यमबाट स्वास्थ बनाउन सकिने कुरामा जोड दिए ।

सहप्राचार्य दीपक गिरीले स्वागत मन्तव्य र विद्यालयका कोअर्डिनेटर सूर्यप्रसाद लम्सालले उक्त अवसरमा भनाइ राखे । प्रतियोगिता सोमबार समापन हुने प्रतियोगिताका सहसंयोजक शिक्षक रामचन्द्र शर्माले जनाए ।