पोखरा । लामा अमृत फाउन्डेसन घान्द्रुकका संस्थापक अमृत गुुरुङले घान्द्रुकका ३ विद्यालयमा शैक्षिक सामग्री र पोसाक वितरण गरेका छन् । कास्कीको अन्नपूर्ण गाउँपालिका वडा नम्बर १०÷११ स्थित घान्द्रुकका सरस्वती आवि, छुर्लुङ आवि र तालवाराही आविका ३७ जना विद्यार्थीलाई फाउन्डेसनका संस्थापक गुरुङले शैक्षिक सामग्री र पोसाक वितरण गरेका हुन् ।

शैक्षिक सामग्री र पोसाक वितरणपछि फाउन्डेसनका संस्थापक गुरुङले सामाजिक उत्तरदायित्व बहन गर्ने उद्देश्यले शिक्षासँग जोडिएको बताए । ‘घान्द्रुकको विभिन्न स्थानलाई समेटेर वृत्तचित्र निर्माण गरेको थिएँ, घान्द्रुक, पोखरा र काठमाडौं लगायत स्थानपछि बेलायत र हङकङमा वृत्तचित्र प्रदर्शन गर्ने अवसर पाएँ’, गुरुङले भने, ‘फाउन्डेसनमार्फत् विभिन्न क्षेत्रमा जोडिएको छु, सामाजिक उत्तरदायित्व बहन गर्ने उद्देश्यले शिक्षासँग जोडिएको छु ।’

हामीले शैक्षिक क्षेत्रबाहेक स्वास्थ्य र खेलकुद क्षेत्रमा पनि सहयोग गर्दै उनले बताए । ‘हामीले यस अगाडि पनि विभिन्न समयमा सहयोग गरिसकेका छौं, शैक्षिक क्षेत्रसँगै यस अगाडि स्वास्थ्य र खेलकुदमा पनि सहयोग गर्दै आएका छौं,’ उनले भने । फाउन्डेसनले यसअघि लमजुङको एक विद्यालय र घान्द्रुकको तिख्यानस्थित कुर्लङवराह आधारभूत विद्यालयमा विद्यार्थीलाई शैक्षिक सामग्री वितरण गरेको थियो ।