पोखरा । पोखराको बाटुलेचौरमा भएको अन्तरविद्यालय स्तरीय हाजिरीजवाफ प्रतियोगितामा विन्ध्यवासिनी मावि प्रथम भएको छ । विन्ध्यवासिनी माविले आयोजना गरेको सामुदायिक विद्यालय स्तरीय प्रतियोगितामा भारती भवन मावि द्वितीय र नारायण आधारभूत विद्यालय तृतीय भएका छन् । कक्षा १ देखि ३ सम्म अध्ययन गर्ने विद्यार्थीबीचको प्रतियोगितामा १४ वटा विद्यालय सहभागी भएको कार्यक्रम संयोजक आधारभस्त तहका सहइन्चार्ज गोविन्द शर्माले जानकारी दिए । यसअघि कार्यक्रमको उद्घाटन गर्दै पोखरा महानगर शिक्षा महाशाखाका शिक्षा अधिकृत जीवन रेग्मीले विद्यार्थीको व्यक्तित्व तथा नेतृत्व विकासका लागि अतिरिक्त क्रियाकलाप महत्वपूर्ण हुने बताए ।

विद्यालय व्यवस्थापन समितिका ज्येष्ठ सदस्य गुरुदत्त भट्टराईको अध्यक्षतामा भएको कार्यक्रममा विद्यालयका प्रधानाध्यापक कृष्णप्रसाद आचार्य, शिक्षक अभिभावक संघका अध्यक्ष भीमप्रसाद पौडेल, सहायक प्रधानाध्यापक रामबहादुर बानियालगायतले बोलेका थिए । कार्यक्रम सञ्चालन शिक्षक उमा अधिकारीले गरेकी थिइन् ।