पोखरा । तुलसीमान श्रेष्ठ स्मृति समाज काठमाडौंले पोखरा निवासी प्राडा कुसुमाकर न्यौपानेलाई सम्मान गर्ने भएको छ ।

मंसिर २३ गते नेपाल प्रज्ञाप्रतिष्ठानको सभाकक्षमा विशेष कार्यक्रम गरी प्राडा न्यौपानेलाई तुलसीमान श्रेष्ठ स्मृति लोकसाहित्य सम्मानद्वारा पुरस्कृत गर्न लागिएको समाजले जनाएको छ ।

यसअघि उक्त सम्मान सत्यमोहन जोशी, प्राडा चूडामणि बन्धु, तुलसी दिवस लगायतलाई प्रदान गरिएको छ ।

पर्वत पैयुँ–६, डाँडाकाहुँमा जन्मेका न्यौपानेले विसं २०४५ सालदेखि त्रिवि अन्तर्गत पोखराका विभिन्न क्याम्पस तथा शैक्षिक संस्थामा प्राध्यापन गरे।सेवा निवृत्त उनी हाल अनुसन्धान तथा लेखन कार्यमा निरन्तर क्रियाशील छन् । उनका कास्की जिल्लामा प्रचलित लोकगीतमा वृक्ष, वनस्पती र वन (२०४९), गोपीचन लोकनाटक (२०६५), लोकरामायण (२०६५), कस्केली जातजाति र उखान (२०६९), दशावतार बालन लोकनाटक (२०६९), नेपाली लोकगीतका सन्दर्भ (२०७०), नेपाली लोकगीत (२०७०) लगायतका अनुसन्धानमूलक पुस्तक प्रकाशित छन् ।त्यस्तै केही कृति प्रकाशोन्मुख रहेका छन् ।

न्यौपानेले शिक्षादिवस पदक (२०५६), प्रतिभा पुरस्कार (२०६७), सिर्जनशील काजीरोसन साहित्यिक पुरस्कार (२०६७), अनेसास रतन झा स्मृति उत्कृष्ट पुरस्कार (ई.२०११),नेपाल विद्याभूषण क (२०६८), अनेसास हरिभक्त कटुवाल स्मृति सर्वोत्कृष्ट पुस्तक पुरस्कार (ई.२०१३), साझा लोकसाहित्य पुरस्कार, त्रिभुवन विश्वविद्यालयबाट दीर्घसेवा पदक २०७४, गीताञ्जली साहित्यरत्न पुरस्कार (२०७६) लगायतका पुरस्कारका साथै दर्जनौँ सम्मान पनि प्राप्त गरिसकेका छन् ।