पोखरा । गण्डकी बोर्डिङका विद्यार्थीले पोखरा वृद्धाश्रम भ्रमण गर्नुका साथै सहयोग गरेका छन् ।

कक्षा ७ मा पढ्ने १ सय २६ जना विद्यार्थी पोखरा १७, ढुंगेसाँघुस्थित पोखरा वृद्धाश्रममा पुगी ज्येष्ठ नागरिकलाई न्यानो लुगा, खाद्यान्न तथा फलफूल वितरण गरेका हुन् । विद्यार्थी मानव मूल्य र मानवीयताको अनुभूति विकास गर्ने उद्देश्यले हरेक वर्ष सामाजिक शिक्षा तथा स्थानीय पाठ्यक्रमको पूरकको रुपमा विद्यालयले उक्त कार्यक्रम गर्दै आएको छ ।

यसबाट सामाजिक अध्ययन तथा विद्यार्थीलाई सामाजिकीकरण, सामाजिक मूल्य मान्यता तथा नैतिक शिक्षाको भावनाको विकास हुने विद्यालय प्रिन्सिपल वीरेन्द्र खड्काले बताए ।

यसैगरी, विद्यार्थीले पुम्दीभुम्दीस्थित शान्ति स्तुपामा गई ध्यान गर्नुका साथै पुम्दीकोट विशाल महादेवको मूर्तिको दर्शन गरेका छन् । विद्यार्थी साथमा ३ जना शिक्षकको परामर्शसहित विद्यार्थीलाई विभिन्न कार्यमा जिम्मेवारी तोकिँदा विद्यार्थीमा क्षमता विकास हुने अपेक्षा गरिएको छ ।