पोखरा । संस्थागत एवं निजी विद्यालयहरुको छाता संस्था (युनिप्स) नेपालको आयोजनामा पोखरामा सोमबार पाँचौ युनिप्स खेल महोत्सव सुरु भएको छ । पोखरा रंगशालास्थित भलिबल प्रशिक्षण केन्द्रमा पहिलो दिन भलिबलका प्रतिस्पर्धा सुरु भए ।

छात्रछात्रा भलिबलतर्फ १६ टिमले सहभागिता जनाएको युनिप्स अध्यक्ष शान्तबहादुर गुरुङले बताए । प्रतियोगितामा छात्रछात्रा दुवैतर्फ कालिका इङलिस बोर्डिङ फाइनलमा प्रवेश गरेको छ । उपाधिका लागि छात्रतर्फ वेलनन एकेडेमीसँग छात्रातर्फ होली एञ्जलसँग प्रतिस्पर्धा गर्ने खेलकुद उपसमिति संयोजक विनोदकुमार नेपालीले बताए ।

त्यसअघि भएको सेमिफाइनलमा छात्रतर्फ कालिकाले एकता बोर्डिङलाई २५–९ र २५–१४ को सोझो सेटमा पराजित गरेको थियो । छात्रातर्फ कालिकाले एकतालाई २५–१३ र २५–२२ ले जित्दै उपाधि नजिक पुगेको हो । भलिबलमा कालिका, होली एन्जल, सिलसिला, स्माइल हेभन, गेफ, पिनाकल र एकता बोर्डिङको सहभागिता छ ।

१६ मंसिरसम्म हुने महोत्सवअन्तर्गत छात्रछात्रा भलिबल, छात्र फुटबल, छात्रारछात्रा खोखो, कवड्डी र एथलेटिक्सका खेलहरु सञ्चालन हुने छन् । महोत्सवको औपचारिक उद्घाटन १४ गते हुनेछ ।

प्रतियोगिताअन्तर्गत माविस्तरीय भलिबलसहित फुटबल, भलिबल, खोखो, कबड्डी, एथ्टिक्स लगायत खेल हुने खेलकुद उपसमिति संयोजक नेपालीले जनाए ।

प्रतियोगितामा युनिप्समा आवद्ध रहेका १८ विद्यालयका ४ हजारभन्दा बढी खेलाडीहरुले सहभागिता जनाउने आयोजकले जनायो । प्रतियोगिता सम्पन्न गर्न करिब १२ लाख खर्च हुने आयोजकको अनुमान छ । यसअघि कोरोनाका कारण ३ वर्षदेखि महोत्सव रोकिएको थियो ।