पोखरा । नेपाल पत्रकार महासंघ गण्डकी संस्थापक अध्यक्ष तथा तत्कालीन केन्द्रीय सदस्य त्रिभुवन पौडेलको स्मृतिमा स्थापित अक्षयकोषमा रामचन्द्र राईले १ लाख सहयोग गरेका छन् ।

पूर्व सहकर्मी राईले त्रिभुवनको निधनको १३ औं दिन पुण्यतिथिमा उक्त रकम सहयोग गर्ने घोषणा गरेकोमा पोखरामा सोमबार उनकी सुपुत्री प्राप्ति राई र पत्रकार अपिल त्रिपाठीले सो रकम बराबरको चेक महासंघ महासचिव गोविन्द सुवेदीलाई हस्तान्तरण गरे । अक्षयकोषको रकम पत्रकारिताको विकासमा प्रयोग गरिने सुवेदीले बताए । कोषमा हालसम्म साढे ४ लाखभन्दा बढी रकम संकलन भइसकेको छ ।

कार्यक्रममा पत्रकार महासंघ कास्की अध्यक्ष विमला भण्डारीले पौडेलको सक्रियता र सकारात्मकता सबै पत्रकारका लागि प्रेरणा भएको बताइन् ।

पौडेलको स्मृतिमा त्रिभुवन पौडेल स्मृति प्रतिष्ठान पनि हालै गठन भएको छ ।

पत्रकार पौडेलको गत वर्ष १ माघमा यती एयर दुर्घटनामा निधन भएको थियो ।