पोखरा । पोखरा–२५, बासबोट निवासी शिक्षासेवी भीमराज शर्मा पौडेलको निधन भएको छ ।

उच्च रक्तचाप पीडित पौडेलको शनिबार बिहान ६५ वर्षको उमेरमा नेपालगञ्जस्थित टिचिङ अस्पतालमा निधन भएको हो । यसबीचमा उनी तिहारको टीका लगाउन बासबोटबाट दाइको घर कोहलपुर गएकोमा बिरामी भई उपचाररत थिए ।

उनको आइतबार कोहलपुरमै अन्त्येष्टि गरिएकोमा छोरा छविरमण पौडेलले दागबत्ती दिए ।

स्व: पौडेल तत्कालीन टुँडीखेल तथा हेमजा स्रोतकेन्द्रका स्रोतव्यक्ति हुन् । उनले अम्बिका माविमा प्रधानाध्यापक तथा मेश्रम वराह मावि घान्द्रुक, वराह मावि धितालमा शिक्षक भई सेवा गरेका थिए ।

शिक्षाक्षेत्रबाट अवकाश भएसँगै पछिल्लो समय उनी नेपाली कांग्रेसको राजनीतिमा सक्रिय थिए ।

उनी कांग्रेस पोखरा २५ का हाल सचिव हुन् ।

पौडेलका श्रीमती, दाइ, २ छोरा, २ छोरी, बुहारी १ तथा ४ जना नातिनातिना छन् ।