पोखरा । थकाली सेवा समिति क्षेत्रीय कार्यालय पोखराले समितिमा आबद्ध ज्येष्ठ नागरिक र विद्यार्थीलाई सम्मान गरेको छ ।

संस्थाको ६१ औं वार्षिक साधारण सभाको उद्घाटन् समारोहमा ८० वर्ष काटेका ६ जना ज्येष्ठ नागरिकलाई अभिनन्दन तथा २०७० साल यता विभिन्न विषयमा स्नाकोत्तर (मास्टर्स) गरेका १७ जना विद्यार्थीलाई सम्मान गरिएको हो ।

कार्यक्रमका प्रमुख अतिथि समितिका ज्येष्ठ सदस्य ९९ वर्षीय पदमबहादुर गौचन र समितिका अध्यक्ष इन्जिनियर रुजिन्द्र तुलाचनले दोसल्ला आढाएर अभिनन्दन तथा सम्मानपत्र प्रदान गरेका थिए ।

यसैगरी ५, ८, १० र १० जोड २ को परीक्षा उत्कृष्ट अंक ल्याई उत्तीर्ण हुने ७ जना छात्रछात्रालाई जनही ५ हजार नगदसहित सम्मानपत्र दिइएको छ ।

प्रमुख अतिथि पदमबहादुर गौचनले ज्येष्ठ नागरिकको रुपमा सम्मानित हुँदा र सम्मान गर्न पाउँदा खुसी लागेको बताए ।

कार्यक्रममा समितिकिा पूर्व केन्द्रीय सल्लाहकार डा. सोमत सिंह तुलाचन, संघीय सांसद विमल गौचन, पूर्व सांसद प्रेमप्रसाद तुलाचन तथा पूर्व अध्यक्ष विश्वमोहन गौचनले शुभकामना मन्तव्य राखेका थिए ।
समितिका अध्यक्ष रुजिन्द्र तुलाचनको अध्यक्षतामा भएको उक्त कार्यक्रममा सल्लाहकार किरण भट्टचनले स्वागत तथा अशोककुमार भट्टचन र सहसचिव भक्त शेरचनले सञ्चालन गरेका थिए ।
साधारण सभाले सचिव अशोककुमार भट्टचनबाट प्रस्तुत प्रगति प्रतिवेदन र कोषाध्यक्ष गोपी तुलाचनबाट प्रस्तुत आर्थिक प्रतिवेदन पारित गरेको थियो । साधारण सभाले पुरानो क्हुण्डल (स्वयंसेवक) समूहलाई बिदाइ गरी नयाँ क्हुण्डल १० जना चयन गरेको छ ।