पोखरा महानगरपालिका वडा नम्बर १२ को आयोजनामा मंगलबार उक्त वडामा डेंगु रोगसम्बन्धी अभिमुखी तथा सचेतना कार्यक्रम सम्पन्न भएको छ । कार्यक्रममा टोल विकास संस्था र आमा समूहका प्रतिनिधि, स्वयंसेवीकाहरु र स्थानीयले भाग लिएको वडा अध्यक्ष सन्तोष बास्तोलाले जानकारी दिए । गण्डकी स्वाथ्य निर्देशनलयका कर्मचारीले उक्त अवसरमा डेंगुको रोकथाम र उपचारका बारेमा अवगत गराएका थिए ।

नेपाल रेडक्रस सोसाइटी पोखरा १२ उपशाखाको व्यवस्थापन तथा स्वास्थ्य महाशाखा गण्डकीको प्राविधिक सहयोगमा कार्यक्रम आयोजना गरिएको हो । कार्यक्रमका सहभागी वडा कार्यालयदेखि आयोजना गरिएको र्‍यालीमा भाग लिई स्थानीय शितलादेवी मन्दिरको परिक्रमा गरी पुनः वडा कार्यालय आइपुगेका थिए ।

देशव्यापी रुपमा डेंगु रोगको प्रकोपले तीव्रता पाएपछि जनसमुदायलाई सचेत गराउने उद्धेश्यले कार्यक्रम आयोजना गरिएको वडा अध्यक्ष बास्तोलाले अवगत गराए । उनले आफ्नो घर वरपर र लामखुट्टेले फूल पार्न सक्ने पानी जमेका स्थान सफा राख्न पनि वडावासीसँग आव्हान गरेका छन् । पोथी लामखुट्टेको टोकाईबाट डेंगु रोग सर्ने चिकित्सकहरुले बताउँदै आएका छन् ।