साईकल लेन कि पार्किङ ?

धनबहादुर गुरुङ
जेठ २४, २०७९
Cycle Lane Photo

पोखरा । जुन ३ अर्थात् विश्व साइकल दिवस । दिवस अवसरमा पोखराका साइकल यात्री यात्रामा निस्किए । पोखरामा भर्खरै बनेको साइकल लेनमा सरर कुदाउँला भनी सोचेका उनीहरुको यात्रा भनेजस्तो भएन ।

पोखरामा उपलब्ध करिब ७० साइकल यात्रीहरु साइकल लेनमै कहिले ट्याक्सी पार्किङ त कहिले बाइक–स्कुटर पार्किङले हैरानीमा थिए । कुनै स्थानमा पैदल यात्रुले नै बाटो छेक्थे ।

पोखरा महानगरले जिरो किलोमिटरदेखि बिपीचोकसम्म बनाएको लेनमा चलाउँदा पटक–पटक समस्या भोग्नुपरेको साइकल यात्री विश्व तण्डुकारको गुनासो छ । ‘विश्व साइकल दिवस मनाउने भनेर हामीले नयाँ लेनमा यात्रा गरेका थियौं, साह्रै गाह्रो भयो,’ उनले भने, ‘जिरोबाट बिपीचोकसम्म पुग्दा ठाउँठाउँमा पार्किङ गरेको भेटियो ।’ बिहानको समयमा गु्रपमा साइकल यात्रा गर्दा समेत झमेला व्यहोरेको उनको भनाइ थियो ।

साइकल लेनबारे धेरैलाई ज्ञान नहुँदा सर्वसाधारण साइकल यात्रीले झनै समस्या झेलिरहेको उनको भनाइ थियो । ‘हामी ग्रुपमै हिंड्दा त यति धेरै समस्या झेलियो,’ उनले भने, ‘अझै एक्लै हिंड्नेहरुको हालत कस्तो होला ?’

पोखरा महानगरले भर्खरमात्र साइकल लेन तयार गरेको हो । स्थानीय तहको निर्वाचनको समयमा सुरु गरेर अहिले सम्पन्न गरिसकेको छ । साइकल सिटी पोखराको परिकल्पना र महानगरको लगानीमा साइकल लेन निर्माण गरिएको साइकल सिटी पोखराका उपाध्यक्ष एवं पोखरा साइकल लेन निर्माण उपभोक्ता समिति संयोजक राजन गोंगजुले जानकारी दिए । साइकल लेन बनाउन महानगले ३० लाख खर्चिएको छ । अहिलेको बजेटमा उपलब्ध ३० लाखमा उपभोक्ता समितिले ५ लाख ३० हजार उठाएको उनले बताए । उनका अनुसार रातारात काम गरेर आयोजनाको काम सकाएको हो । हेमजासम्मै पुर्‍याउने योजना भए पनि बजेट अभाव कारण नसकिएको उनले सुनाए । आगामी दिनमा पोखराभरी नै दुवैतर्फ लेन बनाउने योजना रहेको छ ।

आवश्यकता आधारमा बने पनि अव्यवस्थित : मेयर आचार्य

साइकलमैत्री सहर बनाउने उद्देश्यले पोखराका सडकमा साइकल लेन बनाइए पनि अहिले सबै साइकल लेनहरु अतिक्रमणमा परेका छन् । अहिले यी साइकल लेनको अवस्था हेर्दा सबैको हेपाइ र पेलाइमा परेको देखिन्छ । पोखरा महानगरपालिकाले धेरै महत्व दिएर बनाएको जिरोकिलोमिटर, सिर्जनाचोक, सभागृहचोक, न्यूरोड र महेन्द्रपुल क्षेत्रको सडकको साइकल लेनमा जताततै अवरोध नै अवरोध देखिन्छ । पछिल्लो समय स्वास्थ्य सचेतना र साइकलमैत्री सडक संरचना निर्माण हुने आशा गरिए पनि यस प्रकारको अव्यवस्थाले साइकल यात्रीहरुलाई निरुत्साही बनाएको छ । पछिल्ला समय लेनहरूमा पार्क गरिएका ट्याक्सीहरू र निजी सवारीहरूको फोटो र भिडियोहरू सामाजिक सञ्जालमा देखिन थालेका छन् ।

लेनका पार्किङ नगर्न नराउन साइकल सिटी पोखराले जनचेतना मुलक कार्यक्रम गर्न लागेको साइकल सिटी पोखराका उपाध्यक्ष राजन गोंगजुले जानकारी दिए । ‘यसका लागि हामीले बोर्डहरु त राखेका छौं, सुरुमा साइकल लेन नबुझेकै कारण समस्या भएको हो विस्तारै व्यवस्थित बन्दै जान्छ,’ उनले भने, ‘विस्तारै बुझ्दै गएका छन्, अर्को हप्ताबाट हामीले जनचेतनाका कार्यक्रम गर्दैछौं ।’

पोखरामा राम्रो कामको सुरुवात भएकाले सकरात्मक रुपबाट हेरिदिन उनको आग्रह छ । ‘हामीले बुझाउँदै छौं सबै कुरा नकरात्मकबाट मात्र सोंचेर पनि भएन केही कुरा सकारात्मक भएर पनि सोच्नुपर्छ,’ उनले भने, ‘इन्धनको मूल्य बढ्दै गएको अवस्थामा पछि यसले धेरै सहयोग गर्छ ।’ देशका धेरै स्थानमा लेन बनिरहेका अवस्थामा पोखरामा केहीले नकरात्मक रुपमा हेरिरहेका उनको भनाइ थियो । तर कालान्तरमा यसको आवश्यकता सबैले बुझ्ने गोंगजुले बताए । पोखरामा दैनिक १ हजार साइकल गुड्छन् । साइकल सिटीमा २ सय ५० भन्दा बढी साइकलयात्री आबद्ध रहेका छन् ।

यता, पोखरा महानगरपालिकाका नवनिर्वाचित मेयर धनराज आचार्यले भने आवश्यकता आधारमा बने पनि अव्यवस्थित बनेको प्रतिक्रिया दिए । यसलाई पुनः हेरेर समस्या समाधान गर्ने उनको भनाइ थियो । ‘मैले ट्राफिकसँग कुरा गर्दा जसरी बन्नुपर्ने हो त्यसरी बनेको छैन भन्ने भएको छ,’ मेयर आचार्यले भने, ‘अहिले जे जस्तो देखिएको छ यसले त झन सुन्दरता बढाउने भन्दा घटाउने जस्तो देखियो, त्यो लेनमा साइकल चल्छ कि चल्दैन्? बसको पार्किङको व्यवस्था पनि भएको छैन ? यस कारण यसलाई हामी रिभ्यू गरेर हेर्छौ ।’

Related News

सम्बन्धित समाचार

  • कास्कीमा एसइई उत्तरपुस्तिका परीक्षण रोकियो

    आदर्श समाज सम्वाददाता वैशाख १२, २०८१
    पोखरा । कास्कीमा माध्यमिक शिक्षा एसइईका उत्तरपुस्तिका परीक्षण रोकिएको छ । १० वर्षदेखि उत्तरपुस्तिका परीक्षण पारिश्रमिकमा वृद्धि नभएको भन्दै शिक्षकहरुले…
  • सहारा एकेडेमीमा यु–१४ फुटबल प्रशिक्षण

    आदर्श समाज सम्वाददाता वैशाख १२, २०८१
    पोखरा । सहारा क्लब पोखराको व्यस्थापनमा प्रदेश खेलकुद परिषद् गण्डकीले ‘खेल्छ गण्डकी’ कार्यक्रमअन्तर्गत उक्त यु–१४ फुटबल प्रशिक्षण दिएको छ । दोबिल्लास्थित…
  • गण्डकीमा डायलाइसिसका लागि अब पालो कुर्न नपर्ने

    आदर्श समाज सम्वाददाता वैशाख १२, २०८१
    पोखरा । गण्डकी प्रदेशमा डायलाइसिस सेवाको लागि पर्खाइमा रहेका व्यक्तिको संख्या शून्यमा झार्ने लक्ष्य पूरा भएको छ । बुधबार गण्डकी…
  • स्वदेश फर्किए कतारी अमिर

    आदर्श समाज सम्वाददाता वैशाख १२, २०८१
    पोखरा ।  नेपालको दुई दिने राजकीय भ्रमणमा रहेका कतारका अमिर शेख तमिम बिन हमाद अल थानी स्वदेश फर्किएका छन्। उनलाई…
  • अधिकारी सरकारको मुख्य न्यायाधिवक्ता चिरन्जीवी शर्मा !

    आदर्श समाज सम्वाददाता वैशाख १२, २०८१
    पोखरा । चैत २५ मा एमालेका खगराज अधिकारीलाई प्रदेश प्रमुख डिल्लीराज भट्टले मुख्यमन्त्री नियुक्त गरे । त्यसको पर्सिपल्ट कांग्रेसका सुरेन्द्रराज…

hero news full width